«Иесь прядови вадря невтевкс марто – вишка ды средней предпринимательствань субъекттнэ ламолгадыть – эйстэст уш 23 тежатнеде седе ламо. Ламолгадыть самозанятой эрицятне – иенть перть кавтодо ламос», – тешкстызе Артём Здунов.
Мордовиянь Прявтось евтась сюкпря бизнесэнь представительтненень СВО-нь кирдеманть кисэ. «Тынк лезкстэме мезияк аволь лисе. Сюконято весень икелев минек боецтнэнь ды сынст семиятнень пельде», – мерсь республикань руководителесь.
Артём Здунов тешкстызе бизнесэнть марто вастовомань эрявиксчинть – те лезды кирдемс кеденть пульсонть лангсо, получамс каршо сюлмо, лезэвстэ витемс стакачитнень, конатнень марто вастовить предпринимательтне, седе сеедьстэ - ушодыцятне.
МР-нь экономикань, микшнемань ды предпринимательствань министрань тевтнень топавтыцясь Иван Горин евтнесь бизнесэнтень лездамонь тевтнеде, льготань кредитованиянь вешематнеде, ушодыця предпринимательтнень тонавтомадост.
Вастовомасонть вал максозель бизнесэнь од представительтненень. Сынст проекттнэ пек мельстусть республикань Прявтонтень. Артём Здунов кармавтсь вице-премьерэнтень Наталья Таркаеванень лездамс муемс механизмат сыненст седе тов лездамонть туртов.
Михаил Британ евтнесь сывелень снэктнень нолдамодост. Бизнесэсь ушодовсь 2018 иестэ коптямонь вейке цехстэнть ды 10 важодицятнестэ. Ней предприятиясь келейгадсь 92 ломантнень видьс, продукциясь пачтяви масторонь 67 регионтнэс. Предпринимателесь арси келейгавтомс бизнесэнть, тень туртов эряви льготань кредитования.
Ирина Бурдинова евтнесь БАДтнэнь ды спортонь ярсамопелень производствадонть. Сонзэ предприятиясь - «Рузаевка» ТОСЭР-нь резидент, улить арсемат инвестициянь од проектэнь топавтоманть коряс, конань вельде теевить важодемань од таркат.
Дмитрий Ушаков евтнесь вейк-парконь теемань коряс проекттэнть, предпринимателесь арси теемс истямо тарка Саранскойсэ вейке эрькенть чиресэ. Артём Здунов кармавтсь Саранск ошонь округонь прявтонтень Игорь Асабиннэнь явомс эрявикс лезкс.
Анастасия Баймакова сты оршамопельть, арси келейгавтомс производствань помещениянть, ули кадратнень а сатома – а сатыть стыцят. Промышленностень, наукань ды од технологиятнень министрась Игорь Губайдуллин ды образованиянь министрась Елена Солдатова мерсть: сынь анокт лездамс.
Екатерина Киселева пшкадсь лезкс мельга колл-центранть туртов персоналонь анокстамонть коряс, тосо мереви важодемс декретсэ аватненень, студенттнэнень.
Весе предпринимательтненень ули явозь эрявикс лезкс. Мордовиянь Прявтось тешкстызе, карми кирдеме ванновт ало невтезь весе проекттнэнь.
Мордовия Республикань Прявтонь пресс-службась