Мартонь 10-це чистэ Мордовиянь Прявтось Владимир Волков ютавтсь «Россия-2018» региононь организационной комитетэнь промкс. Прявт тевесь, конань ёвтызе Республикань Прявтось, - те лезэвстэ ютавтомс мирэнь чемпионатонтень анокстамонь шканть.
«Чемпионатонть ушодовомантень кадовсь малав ие, ды минь ней аштетяно анокстамонь пек прявт шкастонть, эрявить эрязкавтомс весе тевтнень, путомс весе вийтнень. Малав весе объекттнэ, конат стявтовить 2018 иень налксематнес, максомат уш тедеде. Эряви пек виевстэ важодемс анокстамонь весе программатнень топавтомга», - тешкстызе В.Д.Волков.
Целанек важодемась моли графикенть коряс, зярыя объекттнэ стявтовить ладязь шканть икельдязь. Ансяк улить зярыя ёнкст, конатненень явома башка мель. Республикань Прявтось кармавтсь пштилгавтомс вановтонть аэропортонь комплексэнь витнеманть лангс. Неень шкане строямонь тевтне тосо виевгавтовсть, ансяк кадовомась кодаяк а изняви. В.Д.Волков ледстизе, келя, объектэнть эрявить максомс иенть прядовомс - кортамось моли пассажирэнь терминалдонть, ливтямонь полосадонть, навигациянь систематнеде.
Республикань Прявтось истя жо тешкстызе, эряви виевгавтомс важодематнень Саранскоень ды Рузаевкань чугункань кинь вокзалтнэсэ ялго якамонь сэдтнень стявтоманть коряс.
Масторлангонь футболонь чемпионатонтень анокстамонь прявт объектэсь - 45 тёжат таркас стадионось. Республикань Прявтось тешкстызе, «Мордовия Арена» стадиононть эряви строямс шкастонзо. Те объектсэнть зярыя ёнкстнэнь коряс тевтне молить ладязь шканть икельдязь, ансяк улить кадовомат тешкстазь шканть эйстэ вельтявксонь металлоконструкциянь монтажонть коряс. «Тень коряс важодеманть эряви виевгавтомс, кадовоманть седе курок изнямга», - мерсь Владимир Волков.
Иенть прядовомс ламо тевть топавтома «Юбилейный» эрямонь комплекссэнть. Кортамось моли ламо квартирань кудотнень, социальной инфраструктурань объекттнэнь строямодост, сынст перька таркатнень мазылгавтомадост. Мордовиянь Прявтось тешкстызе, те районсонть арсеви теемс аквапарк. Ней моли инвесторонь вешнемась, ды объектэсь ули стявтозь, ансяк аволь масторлангонь чемпионатонтень.
Республикань Прявтось тешкстызе, кодамо покш ответственность ашти чемпионатонь анокстыця-ютавтыця регионтнэнь икеле. «Нама, Мордовиясо ветявсть весероссиянь ды раськеютконь покш мероприятият, ансяк футболонь коряс мирэнь пелькстамось ков седе покш. Ды весененень тень эряви чарькодемс. Миненек а эряви манямс эсенек ды весе масторонть», - тешкстызе Республикань Прявтось.
Весе министерстватне ды ведомстватне, конат кирдить ответственность мундиалентень анокстамонть кисэ, кармавтозь виевгавтомс тевест эсест енкстнэнь коряс. Бути икелест путозь тевтне а топавтовить шкастонзо - прявттнэ чумондовить.
Владимир Волков ледстизе, чемпионатонтень анокстамонть мельга пштистэ ваны Россиянь Президентэсь В.В.Путин. Весе регионтнэ-организатортнэ кармавтозь эрьва ковсто максомс отчетт мероприятиянь комплексэнь аравтлувонь топавтоманть коряс. 2018 иень Чемпионатонтень анокстамонть коряс алкуксонь кулянть эряви пачтямс Республикань Прявтонтень - истямо кармавтома максозь Правительствантень оргкомитетэнь промксонть шкасто.
2018 иень футболонь коряс мирэнь чемпионатонтень анокстамонть коряс доклад тейсь Мордовия Республикань Правительствань Председателень полавтыцясь - Целевой программань министрась Алексей Меркушкин.
Мордовия Республикань Прявтонть пресс-службась