Февралень 14-це чистэ Мордовиянь Прявтось Владимир Волков кортынзе раськень культурань касомань-кемекстамонь кевкстематнень – вастневсь «Российской Федерациянь Финнэнь-угрань раськетнень ассоциация» Весероссиянь общественной движениянь прявтонть, Саранск ошонь округонь прявтонть Петр Тултаевень, истя жо Эрзянь ды мокшонь раськень регионъютконь общественной вейсэндявксонь прявттнэнь Юрий Мишанинэнь ды Александр Лузгинэнь марто. Течинь чине республикасонть те сехте покш общественной организация, конань улить филиалонзо Россиянь 40 регионтнэсэ.
Вастовомань участниктне ёвтасть сюкпрянь валт республикань руководителентень раськень культурантень лезксэнь явоманть кисэ, тень ютксо Мордовия Республикань Прявтонть 2017 иень сентябрянь 25-це чинь Указонзо коряс «Шумбрат» республикань раськень-фольклоронь кенярксчись. Кода тешкстазель, сонзэ арсить ютавтомс кизна.
Республикань Прявтось Владимир Волков тешкстызе: раськетнень культурась вейсэнди ломантнень, лезды улемс малавиксэкс ды чарькодемс вейкень-вейкень. «Минек республиканть туртов раськень творчествась, койтне-кирдатне, ремеслатне – те покштояк покш сюпавчи, те минек башка ёнксонок. Прявт меленек – невтемс «Шумбрат» кенярксчинь инжетненень эсь раськень культурань лия ёнов а молиця ёнксонзо, мазычинть, теевтемс мартонзо содавиксэкс седе ламо ломанть», – мерсь Владимир Волков.
Истя жо те вастовомасонть кортамось мольсь Мордовиянь туристической ёнкстнэнь виевгавтомадост. Саемга, республикань районтнэсэ раськень-культурань центратнеде, туристической инфраструктурантень сынст совавтомадост.
Истя жо кортавсть раськень промыслатнень ды ремеслатнень виевгавтомань кевкстематне. Вастовомань участниктне ёвтнесть, февралень 17-це чистэ Теньгушевасо юты «Мордовия мастеровая» республикань этнокультурной проектэнть юрсо промыслань, ремеслань ды народной творчествань фестиваль. Тей тердевить мастерт аволь ансяк республикань районтнэстэ, истя жо шабра ёнкстнэстэ.
Фестивалесь карми покш тевекс весень туртов, кить явить мель раськень культурантень ды ремеслатненень. Семиянь мастерскоень эрьва кодат презентациятнеде башка, юты кругловой столь, косо кортавить Мордовиянь велень территориятнень ванстомасо ды туризманть виевгавтомасо кезэрень промыслатнень ды ремеслатнень таликаст.
Республикань Прявтось Владимир Волков ёвтась мель теемс те фестиваленть свалшкань.
Кевкстематнень кортамосо истя жо ульнесть Мордовия Республикань Прявтонь Администрациянь руководителесь Андрей Богатов ды сонзэ полавтыцязо – Внутренней политикань коряс Управлениянь прявтось Александр Ратников.
Мордовия Республикань Прявтонть пресс-службась