Октябрянь 12-це чистэ Владимир Волков ульнесь Мордовия Республикасо цифровой эфирэнь телевидениянь тевс нолдамосонть. Мероприятиясонть истя жо ульнесть ВГТРК-нь генеральной прявтонь полавтыцясь, региононь департаментэнь прявтось Рифат Сабитов, РТРС-нь радиовещаниянь ды радиосвязень департаментэнь руководителесь Виктор Горегляд, Равчирень федеральной округонь ды Россиянь лия региононь ВГТРК-нь филиалтнэнь прявттнэ.
Торжественной пельксстэнть икеле «Мордовия» ГТРК-нь прявтось Наталия Грановская инжетнень туртов ютавтсь импровизированной экскурсия, невтинзе меельце колмо иетнень перть телецентрань одкстомтозь таркатнень ды од Радио-Кудонть, конасонть неень шкань сехте од техникась.
Кенярксчинь церемониясонть кортамсто, республикань Прявтось тешкстызе, Мордовиясь Россиянь регионтнэнь ютксо васенцекс малав 10 иеде икеле варчамонь проектэнть лувсо нолдызе эсензэ мультиплексэнть, пачтясь цифровой качествань артовксонть республикань сехте васоло ёнкстнэс.
«Цифровой вещаниянть течинь нолдамось – те покш события весе региононть туртов: Мордовиянь весе эрицятнень ней питнень апак пандо мереви ваномс цифровой качествасо телевидениянь 20 каналт. Тень коряс топавтозь покш важодема цифровой технологиятнес ютамонь коряс федеральной программанть лувсо. Ней республикасонок цифровой телевидениянть вельде ваныть малав 100 процентт (99,7 %) эрицят. Истят масторлангонь вешематне, ды Мордовиясо весе те топавтови», – мерсь Владимир Волков.
Владимир Волков тешкстызе, цифровой телевидениянь нолдамось юты республиканть туртов редявикс 2018 иестэнть. «Саранскойсэ масторлангонь чемпионатонть парсте ютавтомась кемекстызе Мордовиянть имиджензэ кода Россиянь сехте паро, мельстуиця, технологиянь коряс сехте виев регион. Тенень пек лездасть налксематнес весе анокстамонть перть ды башка – матчень ютавтома шкасто – массовой информациянь средстватнень вадря важодемаст. Региононть виевгавтомасо, социальной инфраструктурань объекттнэнь строямосо минек изнявкстнэде, эрямонь весе сфератнесэ паро полавтоматнеде ламо ёвтневсь радионь ды телевидениянь тынк эфиртнэсэ», – мерсь Владимир Волков.
Мордовиянь Прявтось ёвтась сюкпря «Мордовия» ГТРК-нь коллективентень, арсесь шкинемасо од изнявкст, истя жо ёвтась сюкпря ВГТРК-нь руководствантень редявикс те проектэнть топавтомасо региононь телерадиокомпаниянтень лезксэнь явомань кисэ.
Торжественной мероприятиясонть телекомпаниянь сехте паро важодицятне казезельть государственной ды ведомственной казнесэ.
***
Мордовиянь Правительстванть Весероссиянь государственной телерадиокомпаниянть марто вейсэнь важодемань кевкстематне кортавсть Мордовиянь Прявтонть Владимир Волковонь ВГТРК-нь генеральной прявтонь полавтыцянть Рифат Сабитов марто важодемань вастовоманть лувсо. Вастовомасонть ульнесь «Мордовия» ГТРК-нь прявтось Наталия Грановская.
Мордовия Республикань Прявтонть пресс-службась