Мартонь 18-це чистэ Мордовиянь Прявтось Владимир Волков примась участия «Союз промышленников и предпринимателей Республики Мордовия» важодема таркань максыцянь региононь вейсэндявксонь вейсэнь промкссонть.
Течинь чинтень Союзонь региононь вейсэндявксонтень, конань прявтсо «Талина» компаниятнень группань президентэсь Виктор Бирюков, совить малав кавто сядт ломанть - промышленной покш предприятиятнень, банктнень, строямонь ды научной организациятнень, агропрмышленной секторонь предприятиятнень, истя жо вишка ды средней бизнесэнь представительтне.
Промкссонть ванкшновсть республикань экономикань виевгавтоманть туртов властенть ды бизнесэнть вейсэнь важодемань кевкстематне.
Владимир Волков путсь промкссонь участниктнень икелев прявт тевть, конатнень эрявить топавтомс васенцекс. Вейкесь эйстэст - экспортонь продукциянь пельксэнть покшолгавтомась. Раськеютконь рынкантень лисемась - республикань предприятиятнень седе тов виевгавтоманть туртов прявт условия. Мордовиянь Прявтось тешкстызе те важодемасонть промышленниктнень ды предпринимательтнень Россиянь союзонь региононь отделениянть республикань Торгово-промышленной палатань марто вейсэнь таликанть. «Топавтомс те тевенть аволь шожда, ансяк эряви, бути минь бажатано седе тов виевгадомс. Эряви арсезь важодема, нолдамс тевс возможностнень, конатнень максы тенек Россиянь экспортонь куншкакурось, экспортонь организационной ды финансонь лезксэнь лия механизматнень. Те республикань Экономикань министерстванть ды васняяк Мордовиянь Торгово-промышленной палатань прявт тевест. Сехте прявтось - миненек весенень эряви чарькодемс раськеютконь уровнянтень лисеманть туртов нолдамс неень шкань продукция, конась машты кирдемс конкуренция мирэнь рынкасонть», - тешкстызе Владимир Волков.
Эряви тешкстамс, Мордовиянь промышленниктнень ды предпринимательтнень Союзонь региононь отделениянь важодеманть юрсо пурназь внешнеэкономической тевдееманть коряс комиссия, сонзэ прявтсо республикань Торгово-промышленной палатань прявтось Константин Пакшин.
Республикань Прявтось истя жо карматынзе предприятяинь прявтнэнь кастомс важодеманть производительностенть, нолдамс тевс икелев молиця технологиятнень, истя жо анокстамс покш квалификациянь кадрат. Владимир Волков ледстизе, республикасонть ладязь од ломантнень марто важодемань цела система. Истя, аволь умок Мордовиясо панжовсь эйкакшонь технопарк, конанть важодемазо нежеди республиканть туртов прявт направлениятнень лангс. Владимир Волков кармавтынзе промышленной предприятиятнень прявтнэнь важодемс эйкакштнень дополнительной тонавтомань од площадкатнень марто, кастомс тесэ сы шкань кадрат эсест производстватнень туртов.
Республикань Прявтось тешкстызе республикань производственной кооперациянь виевгавтомань эрявиксчинть. Владимир Волков янксема марто мерсь: зярс те важодемась а ветяви системань лувсо. Стакачинь витемань вейке ёнксокс карми покш заводтнэнь пингстэ вишка предприятиятнень теемась. Промышленностень, наукань ды од технологиятнень министерствантень максозь кармавтома домкасто ванкшномс те кевкстеманть.
Кода тешкстазель промкссонть, путозь весе тевтне топавтовить государстванть ды бизнесэнть вейсэнь вийсэ. Мордовиянь Прявтось тешкстызе, республикасонть бизнесэнтень карми явозь эрявикс весе лезксэсь, неень шкастонть эряви вейсэ вешнемс эрявикст, виде кить-янт пшти кевкстематнень коряс. Тень пингстэ предприятиянь прявтнэнень а эряви стувтнемс социальной ответственностенть коряс, течинь экономикань стака шкастонть муемс возможность зарплатань кастоманть туртов. Тедеде, ледстизе Владимир Волков, сонзэ эряви кастомс 10 процентс.
Промкссонь участниктне пшкадсть Республикань Прявтонтень сынст талновтыця кевкстематнень марто. Тешкстазель аграрной секторонь вишка предприятиятнень туртов а максовить льготань кредитт. Владимир Волков алтась явомс велень хозяйствань производительтненень лезкс республикань бюджетстэ.
Мордовия Республикань Прявтонть пресс-службась