Декабрянь 22-це чистэ Мордовиянь Прявтось Владимир Волков примась участия 2018 иень Футболонь коряс масторлангонь чемпионатонтень ды 2017 иень Конфедерациятнень кубоконтень анокстамонь ды ютавтомонь коряс Координационной советэнь заседаниясо. Сонзэ ютавтызе Россиянь Правительствань Председателенть полавтыцязо Виталий Мутко.
Толковавсть чемпионатонтень анокстамонь весе кевкстематне. Виталий Мутко кармавтынзе региононь весе прявттнэнь, косо карми ютавтовомо чемпионатось, саемс весе неть кевкстематнень пшти ванновт алов.
Мордовиясо анокстамонь тевтне молить виев лувсо. «Мордовия-Арена» футболонь стадионось теезь 63 процентс. Ламо тевть теезь Саранскоень аэропортонь терминалсонть. Строявить гсотиницат, од кить, эрьва кодат лия объектт. Вице-премьерэсь Виталий Мутко тешкстызе Владимир Волковонь анокстамонь коряс паро роботанзо апак вано ярмактнень марто сюлмавозь стакачитнень лангс.
Заседаниянть прядовомадо мейле Мордовиянь Прявтось ютавтсь чемпионатонтень анокстамось республикань промкс. Владимир Волков тешкстызе, чемпионатонтень шкась кадовсь овсе аламо. Весе объекттнэнь стрямонть эряви прядомс 2017 иенть прядовомс. Секскак анокстамонь программанть топавтомантень эряви путомс весе вийтнень.
Башка кортамо ульнесь футболсо налксемань ды тренировкань паксятнеде, чемпионатонь объекттнэсэ сэтьмечинь ванстомань вешематнень топавтомадост. Кортасть ошонть мазылгавтомадояк. Мордовиянь Прявтось тешкстызе, масторлангонь футболонь чемпионатось Мордовиянь эрьва эрицянтень пек покш события.
«Эряви теемс истя, эрьва эрицясь маряволь эсь прянть мундиалень участникекс, анокстыцякс. Те эрьва кодат мероприятият, невтемакс, од парксо чувтонь озавтнемась. Истямо тевсэ участиясь путсы эрьва ломаненть таликанзо чемпионатонтень анокстамонтень», - тешкстызе Владимир Волков.
Мордовия Республикань Прявтонть пресс-службась