Сентябрянь 26-це чистэ Мордовия Республикань Прявтось Владимир Волков ульнесь РФ-со регионтнэнь виевгавтомань коряс Правительствань комиссиясонть. Сонзэ ветясь Россиянь Правительствань Председателень полавтыцясь Дмитрий Козак, повесткань прявт кевкстематне сюлмазельть регионтнэнь виевгавтомань финанстнэнь марто.
Васенце кевкстемась – бюджетэнь кредиттнэнь коряс Россиянь Федерациянь субъектэнь бюджеттнэнь долгтнень реструктуризациясь, тень коряс доклад тейсь Россиянь Финансонь министрась Антон Силуанов. Промкссонть истя жо мольсь кортамо 2018 иестэ федеральной бюджетстэ межбюджетной трансфертнэнь покшолмадост ды явшемань лувдост.
Ледстясынек, регионь финанстнэнь шумбралгавтомадо задачанть путызе Россиянь Президентэсь Владимир Путин ютазь пецясто Государственной Советэнь президиумонь промкссонть.
2018 иень январень 1-це чистэ Россиясо карми важодеме бюджетэнь кредиттнэнь ташавкстнэнь реструктураизациясь, сон карми молеме сисем иеть, башка регионтнэнь туртов – 12 иеть. Программань важодемань васенце кавто иетнень перть тевс кармить нолдазь льготань условият: регионтнэнень эряви пандомс иезэнзэ долгонь ансяк вете проценттнэнь. Те лезды Россиянь Федерациянь субъекттнэнень маласо кавто иетнень перть олякстомтомс 428 миллиард целковойть ды ютавтомс неть ярмактнень социально-экономической тевтнень витемс, важодемань од таркатнень теемс, ломантнень эрямонь условияст кастомс. Программань прявт тевтнестэ вейкесь – региононь финанстнэнь шумбралгавтомась. Кода учови, программась примави маласо шкастонть. Владимир Путин кармавтсь Правительствантень октябрянть прядовомс ванкшномс программань весе аспектнэнь ды ютавтомс эрявикс важодема эрьва региононть марто. Бюджетэнь кредиттнэнь ташавкстнэнь реструктуризациянь программасонть Россиянь субъекттнэнь участиянь лувтне кортавсть течи Московсо Правительствань комиссиясонть.
Правительствань комиссиясонть важодемась лезды регионтнэнень ёвтамс эсест мелест ды примамс участия Россиянь Президентэнть ды Правительстванть пельде примавиця документнэнь анокстамосо. Владимир Волков комиссиянь важодеманть лувсонть примась участия чинь повесткань кевкстематнень кортамосо, истя жо ёвтась зярыя мельть-арсемат Мордовия Республиканть пельде комиссиянь итоговой документэнтень.
Мордовия Республикань Прявтонть пресс-службась