Мордовиянь Прявтось Владимир Волков мартонь 20-це чистэ вастневсь телень XXIII Олимпийской налксематнесэ бронзань призёронть Анастасия Седова марто.
Ледстясынк, Анастасия Седова – Мордовиясто вейкине спортсменка, конась Россиянь сборноенть юрсо ульнесь Южной Кореянь Пхенчхан ошсо Олимпийской налксематнесэ. Сокссо ардтниця спортсменкась сайсь бронзань медаль эстафетасо.
Республикань Прявтонть марто вастовомасо, Анастасия Седовадо башка, ульнесть тетязо ды авазо – Николай Седов ды Елена Седова тренертнэ, Олимпийской резервань комплексной спортивной школань прявтось Михаил Храмов, истя жо Мордовиянь Спортонь ды физической культурань министрась Владимир Киреев.
Мордовиянь Прявтось ёвтась поздоровт Анастасия Седованень покш казненть кувалма, арсесь спортонь карьеранть виев поладома ды од изнявкст, истя жо олимпиадань. «Те васенце олимпийской медаль сокссонь ардтнематнесэ республикань историясонть, ды сон пек эрявикс спортонь те видэнть виевгавтомга. Ней минь учотано, соксонь секциятнес сыть седеяк ламо эйкакшт, ды сы шкастонть минек кармить олимпийской од чемпиононок», – мерсь Владимир Волков.
Сюкпрянь башка валт республикань Прявтось ёвтась Олимпийской резервань комплексной спортивной школань тренерэнтень Николай Седовнень те ёнксонь эйкакштнень марто важодеманть кисэ, конат уш саить покш таркат масторлангонь соревнованиятнесэ. Владимир Волков тешкстызе, республикась а кирти спортонь финансированиянть, кода профессиональноенть, истя жо массовоенть. Меельце невтевкстнэнь коряс, Мордовиянь 38,5 прпоцентт эрицятне свалшкане явить мель спортонтень.
Мордовия Республикань Прявтонть Указонзо коряс 2018 иестэ Пхенчхан ошсо (Корея Республика) Телень XXIII олимпийской налксематнесэ спортсо покш изнявкстнэнь ды раськеютконь аренасонть Мордовия Республиканть славамонзо кис Анастасия Седова казезь Славань III степенень орденсэ. Теде башка, республикань Прявтонть кармавтоманзо коряс спортсменкантень явозь ярмакт Саранскойсэ кавто нупалень квартиранть рамамс.
Физической культуранть ды спортонть кастоманть-кепетеманть кисэ ды раськеютконь соревнованиятнесэ изницятнень ды призёртнэнь анокстамост кисэ Николай Седовнень максозь «Заслуженный работник физической культуры Республики Мордовия» почётонь лемесь. Елена Седованень ёвтазь Мордовия Республикань Прявтонть Благодарность.
Спортсменкась ды сонзэ тетязо-авазо ёвтасть сюкпря республикань Прявтонтень лезксэнть кисэ ды казсть «Надежда» эйкакшонь ды од ломанень туртов республикань социальной приютонтень сокссонь рамамс сертификатт.
Олимпийской резервань комплексной спортивной школань прявтонтень Михаил Храмовнень максозь «Лауреат Государственной премии Республики Мордовия» званиясь.
Мордовия Республикань Прявтонть пресс-службась