Владимир Пучков тешкстызе, Мордовия Республикасо тевс нолдавить сэтьмечинь ванстомань од технологият, топавтовить Россиянь МЧС-нь весе проекттнэ. Сынст ютксо - эрицятнень зыянтомо тевдеемань комплексэнь системань одкстомтомась, пек куроксто сыця службатнень тердемань «112» Вейкине номерэнь системань ды антикризисэнь управлениянь системань виевгавтомась.
Башка мель явозель регионсонть тундонь чадыведенть молемантень. Мордовиянь Прявтось пачтясь министрантень, республикасонть ванкшновить гидротехникань весе теевкстнэ, оперативной весе службатне анокт. «Региононть ды Россиянь МЧС-нть ули вейсэнь опытэст апак учонь зыянов покш тевенть куроксто витеманть коряс, сон сюлмавозь 2012 иень чадыведенть марто. Сестэ ломантненень явозель эрявикс лезксэсь. Се тевенть мельс саезь, 2017 иень чадыведентень весе эрявиксэсь анок. Регионсонть чадыведень молемась ашти свалшкань ванновт ало», - толковизе Владимир Волков.
Истя жо мольсь кортамо 2018 иень Футболонь коряс мирэнь чемпионатонтень Мордовия Республиканть анокстамодонзо. Тешкстазель, пелькстамонь участниктнень ды инжетнень сэтьмечист ванстомань кевкстематненень явови покш мель. 2016 иестэ Россиянь МЧС-сь одкстомтызе «1 отряд ФПС по Республике Мордовия» ФГКУ-нь толонь мадстемань-идемань специализированной частенть. «Толонь мадстемань-идемань подразделениятнень боевой дежурстванть ютавтоманть туртов вадря условиятнень теемась лезды кастомс важодемань лезэвчинть ды ванстомс ошонть кирвазематнень эйстэ. Минь поладсынек вийтнень покшолгавтоманть, стака шкатнестэ региононь управлениянь Куншкакуронть тевдеемань вадрялгавтоманть. Арсеви пачтямс од техника ды экипировка, ютавтомс тренировкат», - мерсь Владимир Пучков, текень пингстэ тешкстызе, весе мероприятиятне, конат сюлмавозь Футболонь коряс мирэнь чемпионатонтень Саранскоенть анокстамонть марто, ванкшновить сехте вере.
2017 иестэ Московсо, Санкт-Петербургсо, Казаньсэ ды Сочисэ ютавтови футболонь коряс конфедерациятнень Кубокось. Раськеютконь те пелькстамонть анокстамонь ды ютавтомань шкасто пурназь опытэсь карми нолдазь тевс Саранскойсэяк.
Вастовоманть прядовомга Россиянь МЧС-нь прявтось тешкстызе, Владимир Волков яви сатышка мель регионсонть апак учонь зыянов тевтнень а нолдамонтень. Мордовиянь Прявтось эсензэ пельде ёвтась сюкпрянь валт министрантень субъектсэнть сэтьмечинть ванстоманть марто сюлмавозь весе кевкстематнень витемасонть лезксэнь явоманть кисэ.
Мордовия Республикань Прявтонть пресс-службась (Россиянь МЧС-нь пресс-службань материалтнэнь коряс)