Мордовиянь Прявтось Владимир Волков июнень 12-це чистэ якась "Юбилейный" ЖК-нь Россиянь Армиянь проспектсэ стявтозь эйдень од кужонтень. Эйдень учреждениясь кармась колмоцекс, конась панжозь ошонь те районсонть. Эйдень кужось теезь 240 таркас, истя жо тесэ теезь группат беряньстэ неиця ды якиця эйкакштнень туртов.
Мордовиянь Прявтонть туртов ютавтсть экскурсия од зданияванть, невтизь пищеблоконть, бассейнанть, физкультурань ды шкинемань туртов нупальтнень, медицинань блоконть, косо ули физиотерапевтической оборудования, истя жо инфракрасной сауна, конанть эйдень кужонтень казизе республикань Прявтось. Саунась алтазь эйкакштнень шумбрачист витемантень: инфракрасной налтнэнь ало вадрялгавтови иммунной системанть важодемась, те лезды ванстомс рунгонть экшендямонь орматнеде.
Теде мейле республикань Прявтось вастовсь эйкакштнень тетяст-аваст марто. Владимир Волков тешкстызе, эйдень кужось пек вадря ды неень шкантень ладиця, тесэ ули весемесь эйкакштнень кастомаст-тонавтомаст туртов, истя жо материально-технической оснащения ды тонавтыцят. "Целанек микрорайонось лиссь пек паро, неень шкань, - мерсь Владимир Волков. - Строязь пек паро школа, эйдень кужот, аволь васоло (Никольской церькованть вакссо) строяви 4№ эйкакшонь поликлиниканть туртов од зданиясь. Минь бажинек теемс весементь ломантнень вадря эрямост туртов".
Арсеви, эйдень од кужось панжови футболонь коряс масторлангонь чемпионатонть прядовомадонзо мейле. Ансяк, кода тешкстызе республикань Прявтось, бути тетянень-аватнень ули мелест седе куроксто тень теемга, сынст бажамост кирдеви. "Сехте прявтось - седе вадря улезэ эйкакштнень ды сынст аваст туртов, - мерсь Владимир Волков. - Кода сынь арсесызь - истя тейсынек".
Мордовиянь Прявтось ёвтась поздоровт Россиянь Чинть ды Ошонь чинть кувалма, арсесь шумбрачи, сэтьмечи ды паро эрямо.
Мордовия Республикань Прявтонть пресс-службась