«Минек тевесь – теемс вейкеть условият медицинань лезксэнь получамонть туртов, топавтомс эрьва ломаненть туртов шумбрачинь ванстомань первичной звенань доступностенть, апак вано иетнень ды эрямо тарканть лангс. Бути сыть пеняцямот – лисни, мезенть-бути нолдынек ванновт алдо, эряви витемс, – тешкстызе Мордовиянь Прявтось. – Электронной сервистнэ, врачонтень приемс дистанционной сермадстомась теезь ансяк ломантненень лезэс, кодаяк аволь сень туртов, штобу теемс пирявт».
Республикасонть ванстовить больницятнесэ, поликлиникатнесэ медицинань специалисттнэнень сермадстомань весе лувтне, васняяк, сыре ломантнень туртов, конатнень арасть возможностест сермадстовомс «Госуслуги» вейкине порталсонть.
«Те «122» вейкине телефононь номерэсь, медицинань организациянь регистратуранть ды колл-центрань вельде телефононть коряс. Олег Валентинович (Маркиннэнь) эряви эстензэ ванномс – кода важоди системась самай сыре ломантнень туртов. Вадря, бути минек ветерантнэнь улить эйкакшост, нуцькаст, конат лездыть электронной сермадстоманть марто, а бути арасть? Сестэ эрявить волонтёрт, кода ульнесь ковидэнь шкатнестэ – лездыцятне макссть консультацият ломантненень Минздравонь пси линиянть вельде. Те возможностенть мереви ванномс нейгак врачонтень приемс сермадстомань пингстэ минек эрицятненень лезксэнь явоманть туртов», – мерсь Артём Здунов.
Ледстясынек, ютазь иестэнть саезь поликлиникатнень важодемань лувось полавтовсь, седе ламо пациентт понговольть приемс (ней Саранскоень покштнень поликлиникатнесэ врачтне важодить 20 часос, районтнэсэ – 18 часос). Артём Здунов явовтызе региононь Минздравонь меленть те графикень топавтоманть мельга ванномань эрявиксчинть лангс. Теде башка, правительствантень эряви эште весть ванномс республикань районтнэсэ велень эрицятнень туртов медучреждениятнень транспортонь доступностенть, бути эряви – кемекстамс башка тевть.
Мордовия Республикань Прявтонь пресс-службась