Чадыковонь 17-це чистэнть выставкантень сакшнось Мордовиянь Прявтось Артём Здунов. «Васенце лопансетне» – истя лемдеви экспозициясь. Тесэ невтезь ламот фотографиятне путозельть газетатнень васенце лопатнес.
Профессиянтень Олег Еремин сась тетянзо-аванзо вельде - Василий Петрович ды Зинаида Ивановна важодсть фотографокс ошонь бытэнь службасонть. Секскак те ерокчинтень Олег Васильевич кармась тонавтнеме вишка шкасто саезь. Ды те шкас тень теи. Лови, свал эряви тонавтнемс одонтень, пурнамс башка содамочить. Кода кортась Льюис Кэрроллонь персонажось: «Эряви чиемс весе пильгетнесэ, штобу ансяк кадовомс теке таркасонть, а штобу ковгак понгомс, эряви чиемс сехте аламо кавксть седе бойкасто».
«Тешксэв, выставкась ютавтови Семиянь иестэнть ды Важодемань династиятнень иестэнть, – тешкстызе Мордовиянь Прявтось. – Арсян тенк шкинемасо изнявкст! Сехте прявтось – поладодо тееме республикань фотолетописенть ды тонавтомо од ломантнень».
Фотожурналистэнть лавтовонзо удало – редявикс послужной списка, ламо премият ды наградат. 2000 иестэнть саезь сон – Россиянь журналисттнэнь вейсэндявксонтень, Мордовия Республикань Журналисттнэнь вейсэндявксонтень совиця. Артём Здунов казизе Олег Ереминэнь «За личный вклад в развитие Республики Мордовия» Мордовия Республикань Прявтонь Почетонь тешксэ.
Эсь профессиянть фотомастерэсь лови питнеекс секскак, сон казсь тензэ ламо ялгат. Олег Васильевич зярдояк а стувтни фотоцехенть коряс эсь наставниктнень ды коллегатнень, свал покш мель марто ледстни сынст – те Юрий Кемаев, Анатолий Макеев, Вениамин Тюрин, Сергей Стенькин, Николай Каранов, Эдуард Ретунский, Андрей Кондратьев, Юрий Глебов, Геннадий Арефьев. Весе сынь – эсь тевень профессионалт, сынст важодемаст мельга сон вансь, пурнась опытэнть, конань ней уш сонсь максы од коллегатненень.
Эсь важодемадонть Олег Еремин анок кортамс певтеме. Сон вадрясто кирди мельсэ выставкасонть невтезь эрьва снимкань историянть. Ансяк сехте вечкевикс жанрась – спортонь фоторепортажось. Тевесь – аволь шождатнестэ. Тесэ эряви улемс асокс аволь ансяк техниканть коряс – эряви содамс ды марямс спортонь видэнть. Олег Ереминнэнь те топавтовикс – кода «Чемпионат» Россиянь спортонь покш интернет-порталонь внештатной фотограф, сон снимась эрьва кодат пелькстамот, сынст ютксо 2018 иень футболонь коряс масторлангонь чемпионатось.
А эште Олег Еремин вадрясто содасы пертьпельксэнть – сонзэ коряс сон истя жо, кода фотографиянть коряс, анок кортамс куватьс. Пек вадря кортыця-кунсолыця, кемевикс ялга – Олег Васильевич, сюкпря улемат кисэ, минек марто вейсэ важодемат кисэ! Минь тонавтнетяно тонть пельде, истя жо паронтень ды мелень явомантень!
Олег Ереминэнь персональной выставкась карми важодеме Эрьзянь музейсэнть панжиковонь 12-це чинть видьс.
Мордовия Республикань Прявтонь пресс-службась