2023 иестэ Мордовия Республикава МВД-нь коррупциянь а нолдамонь коряс важодемань прявт цетавкстнэде евтнесь МР-ва МВД-нь УБЭП-нь ды ПК-нь прявтось Павел Чапурин. Сон тешкстызе: мероприятиятне, конат аравтозь коррупциянь преступлениятнень ды правань коламотнень, истя жо бюджетэнь ярмактнень тевс нолдамонть пингстэ, конат явовить государственной ды национальной проекттнэнь топавтомантень, а нолдамонь ды профилактикань важодемань лезэвчинь кастомантень, топавтовить Мордовия Республикава Безопасностень федеральной службань Управлениянть, Мордовия Республикань Прокуратуранть ды Мордовия Республикава Россиянь Следственной комитетэнь Следственной управлениянть марто вейсэнь тевдееманть лувсо. Свалшкань лувсо ладязь вейсэнь тевдеема ПФО-со Финансонь мониторингень коряс Федеральной службань Регионъютконь управлениянть марто. 2023 иестэ региононь внутренней тевень органтнэнь важодицятне редясть 207 коррупциянь преступленият, емавксось кармась 324 млн. целковойть.
2023 иестэ взяткатнень средней покшолмась кармась 260 тежат целковойть. Ютазь иенть перть редязь шумбрачинь ванстомань, потребителень рынкань ды ритуальной услугатнень явомань енкстнэнь коряс взяточничествань 52 тевть. Истя, лоткавтозь организованной преступной вейсэндявксонь тевдеемась, ков совасть республикань ритуальной агентстватнень прявттнэ ды важодицятне, конат пачтясть взяткат «Республиканское бюро судебно-медицинских экспертиз» ГБУЗ-нь должностной лицятненень. Ушодозь, ваннозь ды пачтязь судс уголовной тевть 11 преступлениятнень коряс. Истя жо ушодозь уголовной тевть «Мордовская республиканская станция по борьбе с болезнями животных» ГБУ-нь Саранскоень вейсэндязь лабораториянь должностной лицятнень коряс.
Ковидэнь а нолдамонь кампаниянть лувсо коррупциянь тевтнень а нолдамонь коряс ушодозь уголовной тевть шумбрачинь ванстомань учреждениятнень должностной лицятнень коряс, конат сайсть взяткат, истя жо покшт, коронавирусонь инфекциянть каршо фиктивной вакцинациянть кисэ.
Теде башка, 2023 иестэ судс пачтязь уголовной тев Мордовия Республикань Правительствань Председателень икелень полавтыцянть ды Мордовия Республикань экономикань, микшнемань ды предпринимательствань икелень министранть каршо, конат организованной преступной вейсэндявксонть лувсо саласть ули-паро 250 млн. целковойтнеде седе ламонь питнесэ.
Истя жо 2023 иенть перть редязь коррупциянь енксонь 26 преступленият, конатнень топавтызь республикань райононь уровнянь, ошонь ды велень поселениятнень руководительтне.
Ютавтовсь покш важодема региононь промышленной ды агропромышленной комплексэнь прявт объекттнэсэ, редязь должностной лицят, конат получасть ярмакт Россиянь регионтнэнь коммерческой структуратнень представительтнень пельде пачтицятнень явшемстэ сынст мелест-ванновтост кирдемаст кисэ. Коммерческой подкупонь средней покшолмась кармась 625 тежат целковойть. Коммерческой подкупонь тевтне редязь республикань зярыя предприятиятнесэ.
Коррупциянь а нолдамонь коряс республикань программань топавтомань невтевкстнэде пачтясь МР-нь юстициянь министрась Сергей Конычев. Гражданской служащейтнень туртов тонавтомась, доходтнэнь коряс декларациятнень сермадомань кевкстематнень коряс консультациятне ды практической семинартнэ, государственной закупкатнень коряс квалификациянь кастомань курсатне – весе неть мероприятиятне ютавтовить. Ансяк, кода тешкстызе республикань Прявтось, эряви виевгавтомс важодеманть эрицятненень коррупциянь а нолдамонь коряс содамочитнень максоманть коряс. «Коррупциянь енксонь преступлениятнень коряс кулянть эряви пачтямс ломантненень, истя жо путомс билбордтнэс. Ламотнень те карми лоткавтомо правань колыця решениятнень примамсто», – мерсь Артём Здунов.
Государственной программань мероприятиятнень топавтомань коряс важодемась ули поладозь.
Мордовия Республикань Прявтонь Пресс-службась