Умарьковонь 5-це чистэ Саранскоесь кармась кенярксчитнень куншкакурокс, конат алтазельть иневанькс праведной воинэнть Феодор Ушаковонь канонизациянь 20 иетненень. Валске иневанькс праведной воинэнть Феодор Ушаковонь Кафедральной соборсонть ютавтовсь божественной литургия, конань ветизь Санкт-Петербургонь ды Ладожской митрополитэсь Варсонофий, Саранскоень ды Мордовиянь митрополитэсь Зиновий ды Рузонь православной Церьковань лия архиерейтне. Литургиянть шкасто ветязь крестной ютамо ды кенярксчинь молебен апак изняво адмиралонь кеврунгонть вакссо, теде мейле путозельть цецят - тосо ульнесть Мордовиянь Прявтонь тевтнень топавтыцясь Артём Здунов, республикань Правительствань, Рузонь православной Церьковань, РФ-нь Оборонань министерствань представительтне. Апак изняво адмиралонть лемс гайгсь Россиянь гимна, конань морызе Санкт-Петербургсто Россиянь Военно-Морской Флотонть Н. А. Римской-Корсаковонь лемсэ Центральной концертной образцовой оркестрась.
Кенярксчинь мероприятиятнес, конат ютавтовсть Феодор Ушаковонь Кафедральной соборсонть, пурнавсть ламо ломанть - республикань эрицят ды весе Россиясто инжеть. Пурнавозтненень поздоровт кучсь ПФО-со Россиянь Президентэнь полпредэсь Игорь Комаров.
Мордовиянь Прявтонь тевтнень топавтыцясь Артём Здунов Кафедральной соборонь сценанть лангсто евтась поздоровт весе пурнавозтненень, пачтинзе РФ-нь Президентэнь Администрациянь руководителень васенце полавтыцянть Сергей Кириенконь ды властень федеральной органтнэнь лия руководительтнень поздоровонь валост.
"Военно-Морской Флотонь, Оборонань министерствань, Государственной Думань руководительтне кучсть поздоровт, састь неть ведомствань представительтне, те корты Россиянь Федерациянь туртов течинь кенярксчинь смусттенть, - мерсь Артём Алексеевич. - Минек адмиралось содавикс аволь ансяк тюрематнесэ ды изнямотнесэ - сон содавикс сенесэ, бороцясь чуманть каршо, стака иетнестэ Темниковань ёнкссо панжсть госпиталь. А зярдо ульнесь шожда минек масторонть туртов? Ансяк минь а мендявданок, служатанок Пазонтень, служатанок ломантненень, минь свал муйтянок эрявикс лисема куш кодамо стака тевстэ ды изнятанок. Арсян, те виде, минь пурнавтано вейсэ ды славатано минек ине геройтнень. Те минек Россиянь государственностенть юрозо, конадонть свал эряви кирдемс мельсэ".
Санкт-Петербургонь ды Ладожской митрополитэсь Варсонофий пачтясь Мордовиянь эрицятненень поздоровт Московонь ды весе Русень Патриархонть Кириллэнь пельде.
Кенярксчинтень пурнавозтненень поздоровт истя жо ёвтасть Саранскоень ды Мордовиянь митрополитэсь Зиновий, РФ-нь Федеральной Собраниянь Федерациянь Советэнь членэсь Сергей Кисляк.
"Феодор Ушаков вестькак эзь пансе слава мельга, аштесь ве ено политикань интригатнень эйстэ. Сон ульнесь визьдиця, паронь теиця, кандынзе неть енкстнэнь сехте пси ды стака тюрематнень пачк. Мордовиянтень правань коряс мереви кирдемс каштанчи сонзэ кувалма!" - тешкстызе Сергей Кисляк.
Кенярксчинь мероприятиянь инжекс кармасть Госдумань ды Федерациянь Советэнь представительтне Василий Пискарев, Александр Воробьев, Владимир Литюшкин, «Женщины за жизнь» паронь теемань фондонь ветицясь Наталья Москвитина. Официальной пельксэнть прядовомадонзо мейле Мордовиянь Прявтонь тевтнень топавтыцясь кортась республикань эрицятнень ды кенярксчинь инжетнень марто, истя жо якась Ф.В. Сычковонь лемсэ Саранскоень художественной училищань студенттнэнь ды Мордовия Республикань Художниктнень Вейсэндявксонь члентнэнь «Арт-продвижение» выставкантень.
Иневанькс праведной воинэнть Феодор Ушаковонь канонизациянь 20 иетнень тешкстамонть лувсо мероприятиянь инжетне якасть выставкав, конась панжовсь И.Д.Воронинэнь лемсэ республикань краеведениянь музейсэнть.
Мордовия Республикань Прявтонь пресс-службась