Ледстясынек, «Разговоры о важном» уроктне ютазь иень таштамковонь 1-це чистэнть саезь эрьва понедельник ютавтовить масторонь весе школатнесэ ды профессиональной образовательной организациятнесэ. Сынь алтазь неень шкань Россиясо ломанень эрямонь прявт тематненень ды школасо тонавтницятнень ютксо виде питнейчитнень кемекстамонтень.
Форумонь пленарной промкссонть, конась ютавтовсь «Тавла» Тонавтнемань куншкакуросонть, ульнесь Мордовиянь Прявтось Артём Здунов. Саранскоев састь малав 500 классонь ветицят Равчирень федеральной округстонть, 3000 ламо ломанть вейсэндявсть сонзэ важодемантень ве ендо. Форумонь модераторось, Россиянь Минпросвещениянь Академиянь проректорось Ольга Суханова тешкстызе, Мордовиясь макссь ушодкс истят мероприятиятненень, конат ютавтовить масторонь федеральной округтнесэ.
Видеонть вельде пшкадсь Россиянь Просвещениянь министрась Сергей Кравцов: «Ламот регионтнэсэ «Разговоры о важном» уроктне лездасть эйкакштненень пурнамс од содамочить, невтемс эсь пряст, примамс участия социальной проекттнэсэ. Те корты педагогтнень важодемань башка питнейчиденть!»
Кортамонть лувсо Артём Здунов макссь кевкстема классонь ветицятненень: «Разговоры о важном» уроктне улест мельстуицят, сынст эряви ютавтомс шкинемань ендо. Кодамо ежо марто тынь ютавтадо неть уроктнень?»
Саранскоень 10№ школань тонавтыцясь евтнесь эсь ежотнеде: те пек эрявикс важодема, конась веши башка ответственность. «Разговоры о важном» – те масторонтень, сонзэ питнейчитненень вечкемась.
Саранскоень политехнической колледжень представителесь тердизе Артём Здуновонь ютавтомс вейке истямо классонь час сынст тонавтнемань учреждениясонть. Мордовиянь Прявтось покш мель марто кирдизе тердеманть. Эряви тешкстамс, региононь руководителесь уш ульнесь вейке истямо уроконь участникекс.
Саранскоень 31№ лицеень тонавтыцясь кевкстсь: кодат кортамот эзть сато школань иетнестэ Артём Алексеевичнень. «Монень сатотсть, – куватьс апак арсе мерсь республикань руководителесь. - Шкась ульнесь аволь шожда – тонавтыцятне ламо кортасть политикадонть, свал ульнесть анокт максомс каршо валт минек куш-кодат кевкстематнень лангс. Секскак эсь тонавтыцян мон вадрясто кирдян мельсэ. Ансяк эряви чарькодемс, эйкакштне истя жо анокт максомс аволь свал шожда кевкстемат. Обществантень ней эряви видечи, ды вадря, бути эсь кевкстемаст эйкакштне макссызь самай тонавтыцятненень. Эряви кортамс минек од ломантнень марто».
Ульяновскоень ды Саратовань областтнестэ инжетне энялдызь Артём Здуновонь евтнемс фильматнеде ды литературань производениятнеде, конатнень мереви совавтомс уроктнес, ды тердемс тетятнень-аватнень сынст ютавтомантень.
Мордовиянь Прявтось мерсь, целанек кеми советской кинематографсо, рузонь классической литературасо вадрячинтень ды историянь ледстнематнень ванстомантень. Тетятнень-аватнень улемадо меленть сон кирдизе: ломанентень, конась сайсь цетавкст те эли тона енкссонть, эряви евтнемс эсь опыттэнть ды мельтнеде-ванновтнеде од ломантненень.
Вастовоманть прядовомга Артём Здунов евтась сюкпря Россиянь Минпросвещениянь Академиянтень Мордовиясо истямо эрявикс мероприятиянть ютавтомань возможностенть кисэ.
Мордовия Республикань Прявтонь пресс-службась