«Сы иестэ минь карматано покш ды прявт мероприятиясонть - Од ломанень масторлангонь фестивальсэнть. Прявт смустезэ – ладямс сюлмот сеттнень марто, кить сыть минек масторов, – тешкстызе Артём Здунов. – Мордовиянть фестивальсэнть невтсызь 80 участникть ды 30 волонтерт, прявт нежедькс тееви Васенцетнень движениянь активисттнэнь лангс. Миненек истя жо эряви вастомс Мордовиясо омбо масторонь 80 участникть – те кемевтезь масторонь 30 регионтнэнень».
Мордовия Республикань Од ломанень тевтнень коряс Госкомитетэнь председателесь Анастасия Гришнева евтнесь, фестивалень участникекс кармить 20 тежат од лидерт – те Россиянь эрицятне ды весе масторлангстонть малав 10 тежат инжетне. Од ломанень масторлангонь фестивалесь пурнасынзе активисттнэнь ды бизнесэнь, медиань, образованиянь, наукань, раськеютконь вейсэнь тевдеемань, культурань, волонтерствань ды лия енкстнэнь представительтнень. Фестивалень движениянтень васенцеде мереви вейсэндямс 14-17 иесэ од ломантненень. Мероприятиятнень ютавтомасо примить участия 5 тежат волонтёрт весе Россиясто, истя жо ЛНР-стэ, ДНР-стэ, Запорожской ды Херсонской областтнестэ.
«Фестивалень прявт мероприятиятне ютавтовить эйзюрковонь 1-7-це читнестэ Сочисэ «Сириус» федеральной куншкакуросонть. Фестивалень программантень совить аволь ансяк лекциятне ды дискуссиятне, истя жо выставкань программась, культуратнень марто содавтомась, спортонь пелькстамотне ды вейсэнь тренировкатне, паронь теемань акциятне ды путешествиятне. 2024 иень Од ломанень масторлангонь фестивалень поладомакс карми региононь программась – омбо масторонь участниктне сыть Мордовиявгак. Регионтнэсэ сынь теевить содавиксэкс Россиянь культурань ды раськень сюпавчинть марто, молить промышленной предприятиятнес. Минек республикась топавты программанть «Жить и работать в России» тематиканть коряс», - тешкстызе Анастасия Гришнева.
Од ломанень масторлангонь фестивалень финалокс карми эйзюрковонь 14-15-це читнестэ масторонь весе субъекттнэсэ «Действуй» региононь фестивалень ютавтомась.
2017 иестэ истямо фестивальсэнть улемадост евтнесть сонзэ участниктне. Ксения Кугушева – «Кубик Рубиков» смарт-пространствань теицясь – тешкстызе, те пек паро возможность теевемс содавиксэкс ды максомс-пурнамс опыт эрьва кодат енкстнэсэ сехте вадря представительтнень марто. МР-нь Госсобраниянь депутатось Ринат Раимов тешкстызе, Россиянь регионтнэстэ фестивалень участниктнень икеле ашти башка тев – панжомс од енкссто минек масторонть весе инжетнень туртов.
Мордовиянь Прявтось кармавтсь оргкомитетэнь члентнэнень, конантень совасть региононь весе ведомстватнень, общественной ды религиозной организациятнень представительтне, покш мель марто кундамс важодемантень республикань пельде делегаттнэнь участиянь программань, истя жо региононь фестиваленть туртов мероприятиятнень аравтлувонть анокстамонть коряс.
Мордовия Республикань Прявтонь пресс-службась