Сундерьковонь 14-це чистэ Мордовиясо чачтоматнень кастомань ды эрицятнень репродуктивной шумбрачист коряс программадонть Артём Здунов видеосвязенть вельде кортась РФ-нь Общественной палатань демографиянь, семиянь, эйкакштнень ды семиянь свалшкань питнейчитнень коряс комитетэнтень совицянь, Россиянь Минздравонь цератнень репродуктивной шумбрачист коряс прявт специалистэнть Олег Аполихин марто, сон Н.А. Лопаткинэнь лемсэ урологиянь НИИ-нь прявт. Олег Аполихин евтнесь чачтоматнень кастомань коряс кевкстематнесэ регионтнэнь опыттэст. Истя, 2011 иестэнть саезь Сахалинэнь областесэнть топавтови вейсэнь проектэсь – тов совавтозь вейсэнь тевтне, конат аравтозь демографиянь стакачитнень каямонтень, од семиятненень лездамонтень. Неть енкстнэстэ вейкесь токши эрицятнень репродуктивной шумбрачист, эйкакшпорасто саезь. Проектэсь невтсь вадря цетавкст.
Артём Здунов тешкстызе, Мордовиясь, паряк, карми истямо регионокс, косо ули нолдазь тевс истямо программась.
«Масторсонть те енкссонть топавтовить ламо проектт, ансяк весе сынь токшить пельксэнь-пелькс. Те тевень топавтомантень эряви кундамс весемеендо. Прявтокс улезэ самай церань факторось: семиянь теемань ды эйкакштнень чачтомань енксонть коряс», – тешкстызе Олег Аполихин.
Тешкстасынек, течинь чинтень, статистиканть коряс, эрьва ветеце церанть улить стакачить эли тандавкст репродуктивной шумбрачинть коряс. Мордовиясь эште 2008 иестэ кармась васенцекс эйкакштнень репродуктивной шумбрачист ванстомань коряс технологиятнень тевс нолдамосонть – панжозель Россиясо васенце «Мужское здоровье» куншкакурось. Сонзэ теемасонзо лездась самай Олег Аполихин ды НИИ-нь специалисттнэ.
«Миненек эряви вейсэндямс те важодемантень региононь покш компаниятнень ды предприятиятнень. Сынь явить мель республикань эрицятнень шумбрачист лангс, – тешкстызе Артём Здунов. – Течи Мордовиясо а сатыть важодиця ломанть – ансяк минек инвестпроекттнэнь топавтоманть туртов эрявить малав 12 тежат ломанть».
Мордовиянь Прявтось евтась сюкпря Олег Аполихиннэнь вейсэнь тевдееманть кисэ, тешкстызе, вейсэнь проектэсь ушодозо важодеме уш сыця иестэ.
Важодемань группантень совасть вице-премьертнэ Галина Лотванова ды Наталья Таркаева, Саранскоень ды Мордовиянь митрополитэсь Зиновий, МР-нь Прявтонь советникесь Елена Семелева.
Мордовия Республикань Прявтонь пресс-службась