«Покш емавксокс весень минек туртов, весе республиканть туртов кармась тынк прявт наставникенть, республикань вешнемань движениянь ушодыцянть Николай Андреевич Кручинкинэнь эрямосто туемась – ломаненть, конась свал одоль оймесэ, – мерсь Артём Здунов. – Ламо иетнень перть сон макссь эсь прянть те важодемантень, сон невтсь Мордовиянь вешнемань движениянть, сонзэ лангс вансть ды поладыть ваномо вешницятнень ламот поколениятне. Ледстясынек Николай Андреевичень чатьмонемань минутасо».
«Ней «Поискесь» – те республикань виев патриотической вейсэндявкс, ков совить 87 вешнемань отрядт, конат важодить школатнень, техникумтнень, вузтнэнь пингстэ – весемезэ те 1,4 тежадо седе ламо ломанть».
«Вешницятнень лезксэст вельде нолдазь 10 томтнесэ Мордовия Республикань Ледстнемань Книгась. Тосо тешкстазь минек земляктнень 130 тежадо седе ламо лемтне, сынь максызь эрямост Отечестванть кисэ», – мерсь Мордовиянь Прявтось.
Эйкакштне, конат ютасть вешнемань движениянь школанть пачк – алкуксонь патриотт. «Тень вадрясто невтизь Донбассо молиця тевтне – эште специальной военной операциянть ушодовомадо икеле, – тешкстызе Артём Здунов. – Мордовиянь ламот вешницятне эште 2014 иестэ доброволецэкс тусть рузонь масторонть ды Донецкой Народной Республикань эрицятнень ванстомо. Васенцетнень ютксо ульнесь Григорий Дмитриевич Сурайкин – Ицялкань педагогической колледженть пингстэ вешнемань отрядонь командирэсь. Сон чавовсь, максызе сехте питнеенть – эсь эрямонть – минек Тиринь масторонть ванстоманзо кисэ. Покш мель эряви явомс вешнемань движениянь участниктненень, конатне течи передовойсэть, лавтовдо лавтовс боевой ялгатнень марто ванстыть Россиянть. Арсетяно тенст изнямо марто велявтомс кудов! Эсень пельде кемевтян: минь поладтано лездамо вешнемань движениянтень, военно-патриотической воспитаниянь коряс важодемантень, Отечествань воинской славань пропагандантень».
Вешницятненень поздоровт истя жо евтасть Госдумань депутатось, «Поисковое движение России» ООД-нь ответственной секретаресь Елена Цунаева, Саранскоень ды Мордовиянь митрополитэсь Зиновий, Мордовиянь Госсобраниянь Председателень полавтыцясь Наталья Долматова, МР-нь Од ломантнень тевест коряс Госкомитетэнь председателесь Анастасия Гришнева, Войнань, трудонь, Вооруженной Вийтнень ды правань ванстомань органтнэнь Всероссиянь общественной организациянь Мордовиянь региононь отделениянь председателесь Иван Цыганок.
Мордовия Республикань Прявтонь пресс-службась