Изнямонь площадьсэнть таштамковонь 6-це чистэ Мордовиянь Прявтось Артём Здунов Мордовия Республикава внутренней тевень министранть Юрий Поляков марто вейсэ ульнесь Саранскойсэ ошонь панжадо строевой ванномасонть ды общественной сэтьмечинь ванстоманть коряс службантень нарядтнэнь разводсонть. Мероприятиясонть ульнесть МВД-нь подразделениятнень руководительтне, внутренней тевень органтнэнь руководительтне, полициянь патрульно-постовой службань, ГИБДД-нь, килангонь-патрульной службань сотрудниктне, Мордовия Республикава Росгвардиянь Управлениянь боецтнэ, истя жо «Отряд Правопорядка» Мордовиянь региононь общественной организациянтень совицятне, кадеттнэ ды юнармеецтнэ.
Ваннозь сотрудниктнень экипировкась, автотранспортонь средстватне, водительтнень анокчись, теде мейле казевсть полициянь сехте вадря сотрудниктне.
Внутренней тевень органтнэнь представительтненень пшкадемстэ, республикань Прявтось евтась тенст сюкпря терроризманть, экстремизманть каршо бороцямонть ды правопорядоконь ванстоманть кисэ аволь ансяк тиринь республикасонть, истя жо Северной Кавказсо, истя жо специальной военной операциясо улеманть кисэ.
«Тынк профессиональной ды эсь прянь а ванстомань службантень эряви максомс сехте покш питне, – тешкстызе Артём Здунов. – Миненек ней а эряви нолдамс обществасонть тевтнень дестабилизациянть, апак вано сень лангс: моли виев каявома кулянь паксясонть. Ды бути криминалонть каршо бороцямосонть саезь башка изнявкст, ансяк кулятнень енкссонть каявоматне поладовить – мошенниктне манчить минек бабатнень, покштятнень, ломантнень, конат кандовить эрицятнень апак вансто категориянтень, бажить совавтомс од ломантнень аволь санкционированной акциятнес. Весенень тенень эряви путомс виев пирявт. Сехте прявтось - эсь тевентень покш мелень явомась, погонтнэнень ды минек Россиянтень кемевиксчись».
Мордовиянь Прявтось истя жо тешкстызе, ули вадря динамика служебной дисциплинань кемекстамосонть, сотрудниктнень профессиональной анокстамонь уровнянь кастомасонть, материально-технической юронь одкстомтомасонть – ведомствань балансонтень пачтязь 16 од автомобильть.
«Полициянь сотрудниктне покш честь марто кандыть службанть аволь ансяк регионсонть, истя жо сонзэ томбале. Саезь изнявкстнэ – весе подразделениятнень ды правань ванстомань весе блоконть вейсэнь бажамотнень цетавксось. Питней эрьва службанть ды эрьва сотрудникенть путовксозо», – мерсь министрась Юрий Поляков.
Сон башка тешкстынзе патрульно-постовой службань сотрудниктнень, службантень аволь умок топодсть 100 иеть. Сонзэ сотрудниктне васенцекс сыть лездамо минек эрицятненень, ванстыть общественной порядоконть, а нолдыть правань коламотнень. Иенть ушодовомсто саезь, 17% киртявсь преступностесь общественной таркатнесэ, панжозь 49 преступленият ППС-нь сотрудниктнень патрулированиянь маршруттнэсэ, тешкстазь 4 тежадо седе ламо административной правань коламот, кундазь 58 лицят, сынст эйстэ 17-тне ульнесть федеральной вешнемасо.
«Минь аштетяно закононь ванстомасо – те минек служебной долгось. Минь кандтано покш ответственность масторонь руководстванть ды эрицятнень икеле. Минь – закононть чачозо!» – пшкадсь Юрий Поляков.
Артём Здунов явшесь «Лада Гранта» ды «Нива» вете од автомобильтнень пельде ключт Саранск ошонь округонь коряс МВД-нь управлениянь, Ромодановань ды Зубова Полянань енкстнэнь коряс МВД-нь отделениятнень сотрудниктненень.
Торжественной маршсо Изнямонь площадьганть ютасть ППС-нь, ГИБДД-нь ды Росгвардиянь сотрудниктне, истя жо кадеттнэ, юнармеецтнэ ды «Правопорядоконь отрядонь» участниктне.
Мордовия Республикань Прявтонь пресс-службась