Сундерьковонь 23-це чистэ весероссиянь турнирэнтень ушодкс макссть Мордовия Республикань Прявтось Артём Здунов ды олимпийской колмоксть чемпионось ды Россиянь спортонь заслуженной мастерэсь Александр Карелин.
Официальной панжомадонть икеле Россиянь бороцицясь ды пелькстамотнень почетонь инжесь ютавтсь мастер-класс од спортсментнэнь туртов. Коверонть лангсо Мордовиясто содавикс бороцицятнень Михаил Мишин ды Артем Сурков марто сон невтинзе эйкакштненень спортонь те видэнь салавачитнень. Церынькатнень ды од ломантнень сельмест палсть – сыненст эсь опытэнть макссь греко-римской бороцямонь масторлангонь тештесь.
Пелькстамотнень панжомсто, Артём Здунов евтась сюкпря Александр Карелиннэнь турнирэнтень самонть ды од ломанень спортонтень лездамонть кисэ.
«Эрьва спортсменэсь, эрьва героесь, эрьва чемпионось ушодызе эсь карьеранть истят аволь покш чемпионаттнэстэ. Кеман, неть пелькстамотнень вельде минь панжтано од лемть, – мерсь участниктненень ды инжетненень региононь руководителесь. – Минек турнирэнтень максозь легенданть - летчикенть Михаил Петрович Девятаевень лемесь, сон чачсь Мордовиясо, эште эрямонзо пингстэ кармась героекс, топавтсь дивавтыця тев 1945 иестэ. Ды зярдо турнирэнтень уш пель пингеде ламо, кеместэ мереви евтамс, сон карми улеме свал».
«Михаил Петрович Девятаев – лиятнень енов а молиця ломань, Советской Союзонь герой. Сон топавтсь ине тев – оргодсь фашистэнь полонсто. Те турнирэсь – сонзэ отвагантень мелень явомань ламо иень тешкс, те ине ломаненть коряс ледстнематнень поладома. Сюкпря Мордовиянь руководствантень, турнирэсь а лоткавты эсь ливтямонзо. Кеман, течинь пелькстамотне невтсызь ваныцятненень спортонь те видэнь весе мазычинть», – мерсь Александр Карелин.
Тешкстасынек, греко-римской бороцямось те аволь ансяк спортонь базовой видэсь, истя жо республикань эрицятнень сехте вечкевикстнэстэ вейкесь. Кемевикстэ мереви евтамс, класической бороцямонь Мордовиянь школась – масторсонть ды масторлангсонть сехте вадрятнестэ вейкесь. Спортсментнэ, конат кастовсть республикасонть, кармасть олимпийской налксематнень, масторлангонь ды Европань чемпионаттнэнь изницякс ды призерокс.
Мордовия Республикань Прявтонь пресс-службась