Росатомонь Композитной дивизионось саи васенце тарка Россиясо ды сови масторлангонь кемень лидертнэнь юткс углеродной волокнань ды сонзэ юрсо теевкстнэнь производстванть коряс, яви инжинирингень лезкс партнертнэнень, вети научно-исследовательской тевдеема.
Вастовомасонть кортамось мольсь Мордовиясо Композитной материалтнэнь куншкакуронть виевгавтомань коряс вейсэнь тевдеемадонть. «Площадкась пек перспективной, арсетяно виевгавтомс сонзэ, истя жо республикань тонавтомань учреждениятнень, Технопарконть марто вейсэ. Ваннотано возможность теемс сонзэ юрсо Россиясо сехте покш куншкакуро, конась карми нолдамо инновациянь продукт пултрузионной технологиятнень юрсо. Тедеде минь уш анокстатано ды пачтятано минек клиенттнэнень лия енов а молиця теевкст – невтемакс, конструкционной композитной материалт ялго молемань ды автомобилень сэдьтнень строямонть туртов», – евтнесь региононь Прявтонтень Дивизиононь генеральной прявтонь полавтыцясь – педе-пев строямонь коряс прявтось Денис Максимов. Эряви тешкстамс, ламот покш технологичной продукттнэ, конатнень нолды компаниясь, – импортонь полавтыцят ды масторлангонь рынкасонть конкуренциянь кирдеме маштыцят.
Вастовомасонть истя жо кортасть Мордовиясо композитной отраслясонть покш квалификацированной специалисттнэнь анокстамонь туртов тонавтомань куншкакуронь теемань коряс арсематнеде. Росатомонь Композитной дивизиононь представительтне явсть покш мель Мордовиянь госуниверситетэнь профилень институттнэнь марто вейсэнь тонавтомань программатнень топавтомантень.
Артём Здунов кармавтсь Мордовиянь Правительствань Председателень полавтыцянтень Батыр Эмеевнень региононь кабминенэнь промышленной блоконть марто вейсэ домкасто ванномс республикасонть инвестортнэнь арсемаст практикасо топавтоманть.
Мордовия Республикань Прявтонь пресс-службась