Финалонь официальной панжомань церемониясь ушодовсь «Моя кибер-Мордовия!» шоу-программастонть. Этно-кибер-моданть невтизе «Варма» арт-театрась, истя жо ульнесь «S.mail» киштемань театрась.
Турнирэнь участниктненень Мордовия Республикань Прявтонть пельде пшкадсь МР-нь Правительствань Председателень полавтыцянь тевтнень топавтыцясь Алексей Ежов: «Компьютерэнь спортось минек региононть туртов спортонь од вид, ансяк сонензэ эрьва чистэ явови покш мель. Мордовиясо кемекстазь 2030 иенть видьс компьютерэнь спортонь виевгавтомань программа. Теезь киберспортонть коряс федерацият, клубт ды секцият, эрьва ие ютавтовить эрьва кодат дисциплинатнень коряс Мордовиянь чемпионат, республикань ды регионъютконь пелькстамот. Минь истя жо арсетяно теемс Мордовиясо Налксематнень теемань покш куншкакуро».
Вице-премьерэсь арсесь турнирэнь участниктненень вадря налксема.
«Саранскоесь кочказь пелькстамотнень ютавтомань таркакс кавто тувталтнэнь коряс. Васняяк, тесэ ули неень шкань эрявикс весе инфраструктурась. Омбоцесь, миненек явозь весемеендонь лезкс республикань руководстванть пельде. Сюкпрянь валт – Мордовиянь Прявтонтень Артём Алексеевич Здуновнень. Кода невти практикась – регионтнэсэ, косо минь ушодтано ютавтомо киберсоревнованият, сынь кармить свалшкань, – мерсь Россиянь компьютерэнь спортонь Федерациянь президентэсь Дмитрий Смит. – Киберспортось виевгавтозь минек масторонь ламот регионтнэсэ, неть пелькстамотне ютавтовить раськеютконь лувсо. Тесэ пурнавсть финалисттнэ ды сехте виев налксицятне».
Панжомань церемониядонть мейле ютавтовсть кибер-баталиятне, конатне невтизь сехте виев киберспортсментнэнь.
Ваныцятнень туртов анокстазель эрьва кодамо программа.
Мордовия Республикань Прявтонь пресс-службась