«Семейное шоу талантов» номинациясонть изницятнень юткс совась Мордовиясто Адушкинтнэнь семиясь. Людмила Геннадьевна ды Василий Васильевич урьвакстозь-венчазь 15 иеть. Сынь кастыть 6 эйкакшт. Весе эйкакштне покш мель явить спортонтень. Эсь шкинемань номерсэнть Валентина Толкуновань «Песенка без конца» композициянть коряс сынь невтизь ерокчист художественной ды спортивной гимнастикасо, спортивной бальной киштематнесэ.
Адушкинтнэнь семиянтень истя жо максозель честь лисемс сцена лангс, зярдо Россиянь Президентэсь панжизе Россиясо Семиянь иенть. Мирдть-нить евтнесть эсест малавикстэст, мельдест-бажамодост, конась топавтовсь – улемс ламо эйкакшонь семиякс.
«Монь пек вадрят эйкакшон! Ды тынь содатадо, кода минек покштятне-бабатне кортасть авакс улемадонть? Те ава, конась чарькодезь полавтызе эсензэ эрямонзо. Ды мон пек кенярдан, мирдень марто минек меленек-ванновтонок вейкеть. Сонтемензэ мон аволинь уле истямокс уцяскавокс!» – тешкстызе сценанть лангсто Людмила Адушкина.
«Минек туртов кармась пек покш честекс невтемс Мордовиянть истямо покш тевсэнть! Минь кортынек масторонь весе регионтнэстэ семиятнень марто, пурнынек-максынек опыт ды совинек 9 семиятнень юткс, конатнень макссть вал Семиянь иень панжомань церемониясонть. Неть ледстнематне ды ежотне ванстовить весе эрямонть перть! Велявтано тиринь республикав уцяскавокс, ламо вий ды арсема марто», – мерсь Василий Адушкин.
Мордовияв изнямо марто истя жо велявты МР-ва Федеральной казначействань Управлениянь важодицянть Инга Вячеславовна Родькинань семиязо. Сынь невтизь ерокчист эрзянь-мокшонь някань тееманть коряс ды изнясть «На все руки мастер» номинациясонть.
Ледстясынек, 2024 иенть Россиянь Федерациянь Президентэсь Владимир Путин яволявтызе Семиянь иекс. «Родные – Любимые» Весероссиянь семиянь форумось кармась сонзэ васенце официальной мероприятиякс. Форумонь важодемась аравтозь весе масторонь семиятнень ды семиянь династиятнень вейсэндямонтень.
Мордовия Республикань пресс-центрась