Республикань Прявтонть Артём Здуновонь ды Мордовиянь пельде Госдумань депутатонть Василий Пискаревонь марто сон якась республикань зярыя исправительной учреждениятнес, истя жо вастовсь МР-ва Россиянь УФСИН-нь руководстванть ды личной составонть марто.
Мордовиясо Стратегической инициативатнень агентстванть пингстэ топавтови икеле пекстазетненень важодемань таркатнень максомань коряс проектэсь. Кода тешкстызе региононь сервисной уполномоченноесь Елена Семелева, проектсэнть уш примасть участия малав 120 чумондозть. Проектэнть лувсо ютавтови истят специальносттнень коряс питнень максомась, кода каменщик, штукатур ды сварщик, важодить экзаменэнь кавто куншкакурот, седе тов арсеви панжомс стамонь тевенть коряс экзаменэнь куншкакуро.
Экзаменэнь куншкакуронь важодеманть марто содавтоманть лувсо Аркадий Гостев якась ИК-10, косо ютавтовсь сварямонь коряс квалификациянь экзаменэсь. Кода евтнесь вейке чумондозесь, Алексей Рубцов, сон аноксты лисемантень, ютась тонавтнема ды сонзэ уш тердизь важодеме Саранскойсэ «ВКМ-Сталь» заводонтень. «Зарплатась вадря, секскак арсян кадовомс Мордовиясо, куш монсь Ярославлясто», – евтнесь сон. Экзаменсэнть ульнесть «ВКМ-Сталь» ды «Рузхиммаш» заводтнэнь представительтне.
ИК-2-сэ ютавтовсь стамонь ерокчинть коряс невтемань экзаменэсь. Саратовань областестэ Дина Федорова истя жо курок лиси олячив. Ды сонзэ уш учи Саранскоень важодемань таркань максыцясь – стамонь студиясь. «Монень вечкеви стамонь тевесь, бажан улемс вадря специалистэкс, – мерсь сон. – Лисемадо мейле минь семиянек арсетяно самс эрямо Саранскоев».
Аркадий Гостев, Артём Здунов ды МР-ва Россиянь УФСИН-нь прявтонь тевтнень топавтыцясь Павел Ломакин кортасть пекстазетнень ды тонавтыця персоналонть марто. Россиянь ФСИН-нь прявтось тешкстызе Мордовиясо топавтовиця проектэнь эрявиксчинть.
Мордовиянь Прявтось Артём Здунов тешкстызе, икеле пекстазетненень важодемань таркатнень максомань проектэсь – те покш важодемань пелькс, конась ютавтови республикасонть демографиянь невтевкстнэнь вадрялгавтоманть, регионов важодемань ресурстнэнь тердеманть, производствань комплексэнь кадрань потенциалонь кемекстамонть туртов. «Мордовиясо максовить лия енов а молиця условият чумондозетнень туртов, кить стясть полавтовомань кинть лангс, – мереви получамс профессия, вадря важодема тарка, ушодомс од эрямо. Минь течи маринек ломантнень пельде Мордовияв эрямо самодо бажамодост. Кирдтяно неть ушодкстнэнь, лездатано сеттненень, кить анокт видестэ важодемс минек республиканть ды масторонть лезэс», – тешкстызе республикань руководителесь.
Теде башка, ИК-2-сэ инжетне якасть стамонь участкантень, стамонь изделиятнень невтевкстнэнь марто выставкань залонтень, истя жо Эйкакшонь кудонтень – усксть эйдетненень Од иень казнеть.
Эйкакшонь кудосонть эрить пекстазь аватнень эйдетне, сыненст колмодо седе аламо иеть. Ней тесэ 16 эйдеть. Теде башка, Эйкакшонь кудосонть аватненень мереви эрямс вейсэ эйдетнень марто.
5№ исправительной колониясонть инжетне ваннызь мебелень производствань коряс педе-пев витнемадо мейле цехенть. Тесэ арсеви теемс офисэнь мебель, школань мебель.
Мордовия Республикань Прявтонь пресс-службась