Ацамковонь 9-це чистэ Мордовиясь весе масторонть марто вейсэ тешксты Отечествань Геройтнень чинть – кенярксчинть, конась алтазь сеттненень, кинень мужестванть ды героизманть кисэ максозь Россиянь Федерациянь Героень, Советской Союзонь Героень лемесь, георгиевской кавалерэнь ды Славань Орденэнь кавалерэнь статусось.
Те чистэнть Мордовиянь прявтошонь Изнямонь площадьсэнть ютавтовсь Ине Отечественной войнасо маштовозь воинтнэнь кеврунгонтень цецянь путомань торжественной церемониясь. Тосо ульнесть Мордовиянь Прявтось Артём Здунов, МР-нь Правительствань Председателень тевтнень топавтыцясь Игорь Фрейдин, Мордовия Республикава прявт федеральной инспекторось Михаил Сезганов, Мордовиянь Госсобраниянь Председателень полавтыцясь Сергей Вдовин, Саранск ошонь округонь прявтось Игорь Асабин ды Саранскоень ды Мордовиянь митрополитэсь Зиновий.
Кеврунгонтень цецят путсть Мужествань кавто Ордентнэнь кавалерэсь Виталий Ломакин, «За отвагу» медальсэ казезетне Дмитрий Аверкин ды Андрей Клемашов, Россиянь Героень довась Надежда Тучина, истя жо республикань военнослужащейтне ды правань ванстомань органтнэнь, военно-патриотической, общественной ды од ломанень организациятнень представительтне.
Мордовиясь кирди каштанчи эсь земляктнень военной доблестенть кувалма. Республикасонть чачозетне а яжавиця стенакс аштесть Чачома масторонть кисэ Васенце Мировой ды Ине Отечественной войнатнесэ, ульнесть Россиясо ды лия государстватнесэ военной конфликтнень таркатнесэ боевой тевдеематнесэ. Ней Мордовиянь цератне, минек шкань алкуксонь геройтне, алкуксокс топавтыть специальной военной операциянь тевтнень, бороцить нацизманть каршо. Мордовиясо чачсть-кассть Советской Союзонь 124 Геройть, Россиянь Федерациянь 6 Геройть, Славань орденэнь 28 пешксе кавалерт.
Маштовозь геройтнень ледстизь чатьмонемань минутасо.
«Мельспаро, республикань од ломантне примить участия истят мероприятиятнесэ. Эрьвантень эряви содамс ды кирдемс мельсэ масторонь историянть, кирдемс каштанчи геройтнень кувалма, конат алтызь эрямост Чачома масторонтень служамонтень. Минек шкань алкуксонь геройтне – доброволецтнэ, конат лездыть минек боецтнэнь семиятненень. Покш сюкпря тенст тень кисэ», – мерсь Артём Здунов.
Мордовия Республикань Прявтонь пресс-службась