«Тиринь енксонь вечкевикс эрицят, течи алкукс пек валдо, кенярксов, маней чи, – пшкадсь ошонь эрицятненень республикань руководителесь. – Минь тынк марто весементь тейтяно Пазонть лезксэнзэ марто. Арсинек теемс парк – паркось ули. Арсинек лемдемс парконть Донбассонь ванстыцятнень лемс – теинек, путынек кев. Ней уш стявтозь часовня, ков кармить сакшномо, ванномо эсь арсематнень. Часовнятне кезэрень пингетнестэ саезь стявтовить маштовозь боецтнэнь лемс, неень шкань боецтнэнь шумбрачист лемс, сэтьмечинть лемс. Мон арсян, минек часовнясь карми истямо жо. Неян тесэ од ломанть, общественной ды религиозной организациятнень представительть, мельявовикс ветерант. Евтан сюкпря весенень, кие лездась те часовнянь стявтомасонть – валсо, тевсэ, ярмактнесэ, важодемасо. Раськетнень вейсэндявомань чинть, Пазонь Авань Казанской пазавань чинть каршо арсян весенень паро, сэтьмечи. Неень шкане сэтьмечись добовави покш-покш важодемасо. Ды Россиясь – се масторось, конась топавты сэтьмечинть минек планетасонть. Минек боецтнэ чарькодест: сынь воевить аволь стяко. Минь свал кирдевелинек мельсэ маштовозетнень. Евтан поздоровт весенень те покш чинть кувалма ды арсян, минь топавтано пек покш тевть натой истят аволь покш эскелькстнэсэ».
Часовнянть панжомасо кортасть Саранскоень ды Мордовиянь митрополитэсь Зиновий, МР-ва Россиянь УФСБ-нь Ветерантнэнь советэнь председателесь Николай Сипягин, СВО-нь участникесь Сергей Пронькин.
«Минь светятано часовнянть Пазонь Авань Казанской пазавань кенярксчинть каршо, конань минь тешкстатано 1612 иестэ польской захватчиктнень лангсо изнямонть коряс ледстнемга, – пшкадсь пурнавозетненень Зиновий митрополитэсь. – Донбассонь Ванстыцятнень скверэсь истя жо теезь Отечествань ванстыцятнеде ледстнемга. Весе, кить путызь пряст Отечестванть кисэ, лововить иневаньксэкс: секс мекс сынь кандызь сехте питнеенть – эсест эрямост – минек кисэ. Кеман, минек вадря, иневанькс койтне-кирдатне ды минек кемемась кармить кемекстамо ды вейсэндямо минек, кармить виекс, конась канды тенек Изнямо. Часовнясь карми минек озноматнень таркакс: иневанькс таркасо сынст свал мари Пазось!»
«Од часовнясь пингеде пингес ванстасы СВО-нь участниктнеде ледстнематнень, – тешкстызе Николай Сипягин. – Минек государствась полады бороцямонть, секскак эряви: эйкакштне кастовост Отечествань ванстыцятнень, геройтнень невтевкстнэнь лангсо».
«Пшкадян од ломантненень, – мерсь кадеттнэнень ды юнармеецтнэнень СВО-нь участникесь Сергей Пронькин, – илядо кеме интернетэнтень, илядо кеме ютубонтень, ловнодо седе ламо книгат историянть коряс. Эсь историянть содазь, тынь карматадо вечкеме Тиринь масторонть ды карматадо чарькодеме, мекс ушодовить войнатне».
Зиновий митрополитэсь светизе од часовнянть, мейле весе, кинь ульнесь мелест, путсть штатолт «Державная» Пазонь Авань пазаванть икелев, озность Россиядонть, минек ванстыцятнеде, Изнямодонть. Штатол истя жо путсь Мордовиянь Прявтось Артём Здунов.
Мордовия Республикань Прявтонь пресс-службась