Отяжбуе поселкасонть «Старт» спортонь-тренировкань куншкакуросонть Дмитрий Патрушев ваннызе укшномань покш бассейнанть.
Лямбирень енксонь Покш Елховка велесэнть мелят госпрограмманть коряс педе-пев витнезь сеске зярыя социальной объектт. Эйдень кужось строязь эште 1981 иестэ велень прявт промышленной предприятиянть улеманзо вельде – «Октябрьская» Агрофирманть. Объектэнтень ней макссть омбоце эрямо – ней те неень шкань дошкольной учреждения ушосто ды потсто.
Федеральной ведомствань руководителентень евтнесть, зданиясонть 11 группат, кельгить 240 эйдеть. Малав 110 млн целковойтнень лангс – те федеральной, республикань ды муниципальной, истя жо «Октябрьская» Агрофирмань бюджеттнэ – ютавтозь аволь ансяк строямонь-монтажонь тевтне ды полавтозь инженерэнь коммуникациятне, истя жо рамазь од оборудования кухнянть, музыкань ды спортонь залтнэнь, медблоконть туртов, мебель ды ламо мезе лия. Весе, мезе вешить неень шкань тонавтомань стандарттнэ.
Эйдень кужонтень максозь эйдетнень СТЕМ-образованиянь технологиятнень коряс федеральной уровнянь инновационной площадкань статусось – программанть вельде ютавтови профориентация ды эрьва кодат ерокчитнень кастома-виевгавтома. Шкинеманть коряс эйкакштне ды воспитательтне важодить театрализациянь ды музицированиянь куншкакуросонть, утренниктне ютавтовить профессиональной валдо ды гайть марто сценанть лангсо. Эйкакшонь группатне валдот, мазыйть, ежось ялгаксчинь.
Покш Елховкань эрицятнень туртов культурань эрямось пек сюпав – важоди хор, раськень ансамбля, гончарной мастерской – весемезэ 24 клубт ды вейсэндявкст. Весе сынь панжозь культурань кудосонть.
Велень клубось истя жо одкстомтозь мелят. Витнезь зданиянь весе нупальтне – 270 таркас ваномань залось, музыкальной гостиноесь, хореографиянь залось, ламо функциянь репетициянь ды спортонь залтнэ, кужинесэ важодемань туртов нупальтне. «Местный дом культуры» проектэнть лувсо рамазь од оборудования гончарной мастерскоенть туртов – сон важоди 2019 иестэнть саезь.
«Агрофирмась – Мордовиянь экономикань виев лавтов, – евтнесь Артём Здунов. – Предприятиянть пек виев производствань юрозо, моли свалшкань экономикань касома ды технологической виевгавтома. Прявтось – компаниясь арси ломантнеде ды полады ламо вишка тевтнень политиканть».
Мордовия Республикань Прявтонь пресс-службась