Мордовиянь финансонь министрась Сергей Тюркин невтизе 2023 иентень ды аравтлувонть мельсэ кирдезь 2024 ды 2025 иетнес республикань бюджетэнь проектэнть. 2023 иентень доходтнэ учовить 53,9 миллиардт целковойтнень покшолмасо, сынст эйстэ налогонь ды аволь налогонь доходтнэ кармить 30,8 миллиардт целковойть.
Сы иентень ютавкстнэнь вейсэнь покшолмась – 55,8 миллиардт. 2023-2025 иетнес бюджетэнь инвестициятнень прявт енксокс карми национальной проекттнэнь топавтомась.
Региононь Правительствань Председателесь Владимир Сидоров тешкстызе, министратнень кабинетэсь кемекстызе бюджетэнь коряс закононь проектэнть пачтямс Мордовиянь Государственной Собранияс сыця сессиясо ванноманть туртов.
Кортавсь тундонь-паксянь тевтненень анокстамось. 2023 иестэ видевить 763,3 тежат гектарт, те 2,6 тежадо седе ламо те иенть коряс.
166 тежат гектартнэ видезь озимой культуратнесэ. Велень хозяйствань предприятиятне рамить видьметь, удобреният, уштомапель, анокстыть техниканть. Кода пачтясь Мордовиянь Велень хозяйствань ды продовольствиянь министрась Александр Кечайкин, ваннови омбо масторсо нолдазь велень хозяйствань техниканть туртов запчасттнень ды комплектующейтнень рамамонь кевкстемась, истя жо пачтямонь од каналтнэнь ладямонть ды импортонь полавтоманть вельде.
Региононь Промышленностень, наукань ды од технологиятнень министерствань руководителесь Игорь Губайдуллин пачтясь, республикань 27 предприятиятнесэ теить запчасть ды комплектующейть велень хозяйствань отраслянть ды перерабатывающей промышленностенть туртов.
Владимир Сидоров тешкстызе, экономикань аволь шожда шкастонть эряви виевгавтомс важодеманть импортонь полавтоманть коряс ды кармавтсь Правительствань Председателень Полавтыцянь тевтнень топавтыцянтень Батыр Эмеевнень вейсэндявомс те енксонь топавтомантень.