«Чавовить пек ламо ломанть, ДТП-тне саить ламо од эрямот. Тесэ, нама, ламось ашти ветицятнень ды ялго молицятнень эйстэ. Ансяк арсян, аволь весе административной ды технической тевтнень кемекстатано минь», – мерсь МР-нь Прявтось, промксонть панжомсто.
Республикасонть эрязасто топавтови «Безопасные и качественные дороги» нацпроектэсь, строявить од кить, одкстомтовить таштотне. Текень марто кинь вадрялгавтоманть пингстэ покшолгавтови транспортонь средстватнень скоростесь.
Бути кортамс ДТП-тнеде, сеедьстэ вастневить – транспортонь средстватнень эшкевемась ды ялго молицятнень лангс ардомась. Истят авариятнень а нолдамонть лангс аравтозь фотовидеофиксациянь комплекстнэнь важодемась. Артём Здуновонь валонзо коряс, те иень кавксо ковтнень перть комплекстнэ ламолгадсть 1,7-ксть, тешкстазь коламотне – 4,5-ксть. Киланга ардомань вешематнень 88 тежат коламотнень тешкстызь мобильной комплекстнэ.
Ламось ашти профилактикань тевтнень вадрячиденть. Киланга молемань-ардомань вешематнень колыть кода тетятне-аватне, истя жо эйкакштне. «Лисни, аволь эрьванть видьс пачкодинек, лисни, неть тевтне эзть кандо практикасо цетавкст. Школатнень марто вейсэ эряви одс нолдамс те важодеманть», – мерсь Мордовиянь Прявтось.
Комиссиянь промкссонть башка мель явозель федеральной трассань талновтыця пелькстнэсэ кинь вельтявкстнэнень. Одс ламо кевкстемат ульнесть Упрдор Москов-Нижний Новгород ФКУ-нь, конась ваны неть китнень мельга. ДТП-тнес ветиця тувталтнэде тосо сатышка, истя жо – покш коллеятне. Сехте стака объекттнэстэ вейкесь - Р-178 Саранск — Сурское — Ульяновск трассанть лангсо Татарский латконть трокс сэдесь, те кинть лангсо моли педе-пев витнемась. Тевтне топавтовить пек куватьс, ней моли подрядчикень полавтомась. Текень марто эрьва чистэ автомобилисттнэ вастовить стакачитнень марто – ардомс тия стака, сеедьстэ теевить пробкат.
Мордовиянь Прявтось Артём Здунов кармавтсь Правительствань Председателень васенце полавтыцянтень Игорь Фрейдиннэнь седе пштистэ ванномс те пелькссэнть важодематнень мельга.
Мезесь токши вадрянь кандыця тевтнень, эсь лезэвчинзэ невти кинь разметкань ды истя лемдевиця проекционной пешеходной переходтнэнь тееманть туртов оптической оборудованиянь путомась. Сынь неявить куш чить, куш веть, куш кодамо перть пельксэнть пингстэ, секскак региононь руководителесь кармавтсь седе эрязасто нолдамс сонзэ тевс. Текень пингстэ, те енкссонть эряви важодемс Саранскоень администрациянтень.
«Весе кирдить мельсэст аволь умонь ДТП-нть пешеходной переходсонть, косо чавовсь эйкакш. Ардат те тарканть вакска, ванат – тосо овтыне озадо, цецят. Седеест весень ризны... Мезекс тень видьс ветямс. Ванноманть эряви ютавтомс шкастонзо: кие вети общественной транспортонть, важоди-арась бесконтактной пандомась эли водителесь а ваны. Коллегат, миненек тынк марто мереви идемс ламо эрямот, ансяк зярс аволь весемесь тень туртов тееви», – мерсь Артём Здунов.
Авариятнень коряс домка статистиканть яволявтызе МР-ва МВД-нь Госавтоинспекциянь Управлениянь прявтонь тевтнень нурька шкас топавтыцясь Алексей Крайнов. Теде башка, сон явсь мель эште вейке стакачинть лангс – чоподава пешеходной переходтнэнь а сатышка валдомтоманть лангс. 21 чассто мейле Саранскойсэ ардомань пелькссэнь вейке енкссонть валдомтомась лоткавтови. Те ламолгавты китнень лангсо зыянов тевтнень тандавксонть. Ризксэс, «зебрантень» пачкодемстэ, сеедьстэ водительтне а киртить скоростенть. Те стакачинь витеманть туртов пешеходной переходтнэнь икелев эряви теемс искусственой аволь виде таркат. «Сынь лездыть!» – тешкстызе сон.
Кинь службатненень эряви кемекстамс башка тевть сень туртов, штобу Мордовиянь китне улест седе сэтьметь. Поладови профилактикань важодемась.
Мордовия Республикань Прявтонь пресс-службась