Мордовиянь Прявтось кармавтсь кемекстамс эрявикс весе тевтнень республикань эрицятнень сэтьмечист ванстоманть коряс, кенярксчитне ютаст сэтьместэ, зыянтомо. «Покш мель эряви явомс кенярксчинь ютавтомань таркатнесэ сэтьмечинь ванстомань кевкстематненень», – тешкстызе Артём Здунов.
Ютавтовиця важодемадонть пачтясть МР-ва внутренней тевень министрась Юрий Поляков ды МР-ва Росгвардиянь Управлениянь прявтось Андрей Каринкин. Виень ведомстватнень сотрудниктне маласо читнестэ ютыть службань кандомань виевгавтозь лувонтень.
Комиссиянь промкссонть истя жо кортасть РФ-нь Президентэнь кочкамотнень анокстамонь ды ютавтомань шкасто сэтьмечинь ванстомадонть. «Кеман, сынь кармить минек масторонь суверенитетэнь, сэтьмечинь кемекстамонтень вейсэнь путовксокс, – мерсь Мордовиянь Прявтось. – Минек тевесь – ютавтомс кочкамонь кампаниянть республикасонть пек покш уровнясо, ванстомс сэтьмечинть вайгелень максомань таркатнесэ, виевгавтомс пек эрявикс объекттнэнь антитеррористической ванстоманть. Покш мель вешить кевкстематне, конат сюлмавозь тонавтнемань организациятнень антитеррористической ванстоманть марто».
Промксонтень пурнавозетне кортасть сень коряс, кода исполнительной властень ды местной самоуправлениянь органтнэ топавтыть Национальной антитеррористической комитетэнь ды МР-нь Антитеррористической комиссиянь решениятнень. Кунсолозь Мордовиянь образованиянь министранть Елена Солдатовань, Саранск ошонь округонь прявтонь полавтыцянть – Социальной политикань коряс департаментэнь прявтонть Оксана Шуляповань, Лямбирь енксонь прявтонть Юрий Головонь, Ицялонь енксонь прявтонь васенце полавтыцянть Александр Сусенковонь пачтямотне.
Промкссонть кемекстазь 2024 иентень Мордовия Республикань Антитеррористической комиссиянь ды Мордовия Республикань Оперативной штабонь важодемань аравтлувтне.
Мордовия Республикань Прявтонь пресс-службась