Минек ине земляконть коряс васенце полнометражной документальной-налксемань фильмань съемкасонть ульнесть Россиянь содавикс актертнэ - Елизавета Арзамасова, Даниил Спиваковский. Станислав Дужников налксизе скульпторонть тетянзо. Прявт роленть налксизе Эрзянь-мокшонь раськень драмань театрань актерось Павел Михайлов.
Ваномо пурнавозетненень пшкадсь Мордовиянь Прявтось Артём Здунов. «Минек тееви од отрасля, минек туртов пек эрявикс. Мон арсян, сон канды миненек ламо мельстуиця, секс мекс сон сюлмавозь лия отраслятнень марто: туризма, транспорт, гостиницань бизнес. Минь сермадтано яволявтомат гранттнэнь лангс, минек эрязасто кирдить», – мерсь республикань руководителесь.
«Аллюр-фильм» кинокомпаниянь генеральной продюсерэсь Алла Каргина евтась сюкпря Артем Здуновнень регионсонть киноиндустриянь виевгавтомантень мелень явоманть кисэ, республикань эрицятненень – лембенть ды оймень путоманть кисэ: «Мон эрян Мордовиясо омбоце ие ды кемевтевинь, берянь ломанть тесэ арасть. Покш сюкпря тенк тень кисэ».
Премьерань невтемань ваныцятне неизь эште кавто фильматнень трейлертнэнь, сынст съёмкань пелькстнэ ютавтовсть республикасонть: «Спасая маленькие жизни» ды «Школа Бабы-Яги». «Спасая маленькие жизни» документальной фильмась евтни Республикань эйкакшонь больницянь медиктнень важодемадост ды алтазь больницянь 60 иетненень. «Школа Бабы-Яги» полнометражной фильманть-евксонть премьеранть арсеви ютавтомс те иень кизна.
Минек республиканть ды кинокомпаниянть улить арсемаст седе тов вейсэнь тевдееманть коряс. Арсеви кундамс «Тайна адмирала Ушакова» полнометражной художественной фильмань съемкатненень, сон евтни 1812 иень тевтнеде, истя жо нолдамс «Школа Бабы-Яги. Продолжение» фильмань-евксонь омбоце пельксэнть.
Мордовия Республикань Прявтонь пресс-службась