Мордовиянь Прявтось тешкстызе, ламо иетнень перть историянь истямо кеврунгонь строямонь коряс кевкстемат састь республикань эрицятнень, рубежень строицятнень эйкакшост-нуцькаст пельде.
«Миненек эряви ванстомс историянь ледстнематнень Ине Отечественной войнань иетнестэ минек земляктнень важодемань ине тевест кувалма. Те питней сеттнень туртов, кить ульнесть Сурань рубежень строямосонть, сынст эйкакштненень, нуцькатненень», – мерсь Артём Здунов ды евтась сюкпря проектэнь топавтомасо лезксэнть кисэ.
Мемориальной комплексэнь проектэнть лувсо – Мордовиясо чачозетнень, кить стявтсть Сурань рубеженть, алкуксонь уцяскаст, – те эйкакшт, сыре ломанть, священнослужительть ды ават. Комплексэсь тееви Покш Березникень парксо.
РВИО-нь Председателень полавтыцясь Николай Овсиенко тешкстызе, проектэсь совавтови эрямос «Культура» нацпроектэнть лувсо. Весе тевтнень арсеви прядомс уш тедеде.
«Сюкпря тенк, Артём Алексеевич, те проектэнтень ды Россиянь военно-исторической обществань региононь отделениянь тевдеемантень мелень явоманть кисэ. Минек туртов те пек эряви!» – мерсь Николай Овсиенко.
Тешкстасынек, Мордовиясо Россиянь военно-исторической обществань региононь отделениясь важоди 10 иетнеде седе ламо – те Россиянь военно-исторической сюпавчинь ванстомань ды содавикс теемань коряс куншкакуро. РВИО-нть марто вейсэ эрязасто теевить ледстнемань таркат, истят кода Саранскойсэ Масторлангонь васенце войнань Геройтненень, Ташто Шайгова велесэ Советской Солдатонтень, Темниковасо содавикс адмиралонтень Федор Ушаковнень, Торбеевасо Советской Союзонь Героентень Михаил Девятаевнень кеврунготне. Покш мель явови од ломантнень марто патриотической важодемантень. РВИО-нть лезксэнзэ пингстэ эрьва кодат иетнестэ Мордовиясто кадеттнэ ды ушаковецтнэ ульнесть эйкакшонь военно-исторической тематической сменатнесэ, 2022 иестэ Мордовиясо ютавтовсть «Страна героев» военно-исторической лагерень кизэнь колмо сменатне.
Мордовия Республикань Прявтонь Пресс-службась