Важодемань прявт невтевкстнэнь яволявтынзе МР-нь шумбрачинь ванстомань министрась Олег Маркин. Сон тешкстызе, шумбракстнемань валтнэсэ, конатнень кучинзе коллегиянтень пурнавозетненень Россиянь Шумбрачинь ванстомань министрась Михаил Мурашко, тешкстазель: республикасонть ладязь важодемань лувось лезды кастомс медицинань лезксэнь явомань вадрячинть.
«Весе минек важодемань смустесь – те ломантнень ванстомась, ломанень капиталонь ламолгавтомась, кода масторонь ды республикань прявт сюпавчинть. Секскак шумбрачинь ванстомань системань прявт тевесь – демографиянь тевтнень вадрялгавтомась ды эрицятнень шумбрачист ванстомась».
2023 иень невтевкстнэнь коряс Мордовиясь саи омбоце тарка ПФО-со ды 17-це Россиясо эрямонь кувалмонь средней невтевксэнь саеманть кисэ – те 74 иеть. 2030 иентень региононтень эряви саемс целевой невтевксэнть – малав 78 иеть.
Ризксэс, республикасонть ванстовить чачтоманть коряс аволь шожда тевтне – меельце вете иетнень перть сон киртявсь малав 26%. Прявт тувталось – чачтомань иесэ аватнень киртямось, 2019 иестэнть саезь сынь киртявсть малав 11 тежас. Текень пингстэ топавтовиця тевтне лездасть киртямс медицинань аборттнэнь 46%.
Тень кувалма прявт енкстнэнь ютксто вейкекс кармась репродуктивной шумбрачись. 2024 иестэ Мордовиясо васенцеде ютавтови диспансеризация эрицятнень репродуктивной шумбрачист кувалма – сон токшесы 148 тежат эрицятнень.
Мелят республикасонть удалась киртямс куломатнень ды колмо иетнень перть васенцеде лисемс ковидтэ икелень невтевкстнэс. Самай 2019 иестэ регионсонть сон ульнесь сехте алкинекс меельце 10 иетнень перть.
Республикасонть свалшкань эпидобстановкань ванстоманть туртов башка мель явови вакцинациянтень.
Шумбрачинь ванстомань весе системань юрось – первичной медико-санитарной лезксэсь. Мордовиясь тешкстазь федеральной уровнясо шумбрачинь ванстомань первичной звенань одкстомтомань программань вадрясто топавтоманть кисэ. Меельце вете иетнень перть райононь больницятнес пачтязь оборудованиянь 429 единицат, 36 автомобильть сэредицятненень врачонть ды фельдшерэнть усксемаст туртов, скорой помощень 59 автомобильть, стявтозь 77 фельдшерско-акушерской пунктт ды врачонь 3 амбулаторият, витнезь 10 седе ламо ФАПт. Текень марто ванстови медучреждениятнень витнемань ды строямонь ды те программань топавтомань поладомань коряс эрявиксчись, ды те решениянть Россиянь Президентэсь кемекстызе.
Целанек мелят республикасонть шумбрачинь ванстомань системанть лангс кассань ютавксось кармась 9 млрд целковойтнеде седе ламо, те иентень аравтлувось малав зяро жо. Льготань лекарстватнень максомс явозь 2 млрд целковойтнеде седе ламо – топавтозь 414 тежадо седе ламо рецепт. Республикань руководствась кемекстась решения явомс финансирования сахарной диабетсэ сэредиця эйкакштнень лецямс. Неть тевтнес республикань бюджетстэ кавто иетнень перть явозь 94 млн целковойтнеде седе ламо – 308 эйкакштненень явозь глюкозань свалшкань мониторингень системат.
«Здравоохранение» нацпроектэнь топавтомань вете иетнень перть финансированиянь эрьва кодат лисьмапрятнестэ явозь 14 млрд целковойтнеде седе ламо: панжозь Республикань онкологиянь диспансерэнь зданиясь, Эйкакшонь РКБ-нь хирургиянь корпусось, Рузаевкасо эйкакшонь поликлиникась, весе енкстнэнь коряс рамазь оборудованиянь 750 единицат. Нацпроектэнть коряс важодемась поладови.
Республикань медучреждениятнесэ кадратнень улемась ПФО-со средней невтевкстэнть седе покш – тень лангс апак вано, сынст явшемась моли аволь вейкетьстэ. Те иентень прявт тевесь – первичной медицинань лезксэнь медорганизациятнесэ, седе пек республикань районтнэсэ, кадратнень дисбалансонь витемась. Истя жо арсеви ютавтомс зярыя тевть, истя жо од специалисттнэнь тердемаст вельде.
Шумбрачинь ванстомань енкссонть башка важодема ветяви СВО-нь участниктнень ды сынст семиятнень реабилитациянь коряс. Мордовиянь медиктне важодить Херсонской областень Каланчакской округсонть – тов ардтнесть минек медиктнень кото бригадат. Ютавтозь эрицятнень малав 24 тежат ванномат.
Обязательной медицинской страхованиянь территориальной фондонь важодемань невтевкстнэде пачтясь фондонь прявтось Владимир Каргаев. Мордовия Республикасо седеень-санонь орматнеде куломатнень киртямонь коряс проектэнть топавтомадо пачтясь 1№ РКБ-нь прявт врачось Дмитрий Амелькин. Сон тешкстызе: ков седе вадря ды келей карми диспансерной учетось, тов седе алкине карми те категориянь орматнень эйстэ куломатнень невтевксэсь.
Орматнень шкасто редямонь эрявиксчинть тешкстызе МР-нь Минздравонь прявт внештатной специалистэсь-онкологось Георгий Веснушкин. Мелят республикасонть редязь пек ламо зыянонь кандыця новообразованият. Сынст ютксто 60% – ранаяк. Текень пингстэ Мордовиясо тешкстави онкологиянь орматнень эйстэ куломатнень киртямось. Те корты: шкастонзо ютазь обследованиясь, ранаяк орманть редямось ды лецямось кувалгавтыть ды ванстыть ломантнень эрямост. Тевтнень вадрялгавтыть аволь умок панжозь амбулаторной онкологиянь лезксэнь куншкакуротне – республикастонть эйстэст ниле.
Коллегиясонть спикертнэ истя жо кортасть организационной решениятнень тевс нолдамодост покштнень первичной медико-санитарной лезксэнь доступностень кастоманть ды республикань хирургиянь службань ежонь вадрялгавтоманть туртов.
Мордовиянь Прявтось тешкстызе: медицинась, весе службатне ды региононь Правительствась кармить важодеме демографиянь стакачитнень витеманть коряс: «Нама, миненек эряви пачтямс весе ресурстнэнь шумбрачинь ванстоманть туртов, васняяк, аватнень ды цератнень репродуктивной шумбрачинть».
Тешкстазель, первичной звенань одкстомтомань коряс проектэнь топавтоманть вельде витевить медико-санитарной лезксэнь прявт стакачитне. Тень лангс апак вано, республикань эрицятнень пельде пшкадематне сыть.
«Минь витнинек зярыя больницят ды поликлиникат, сеске нейтяно ломантнень ежост, каршо сюлмонть. Ней Россиянь Федерациянь Президентэнть лезксэнзэ вельде минь неть кевкстематнень виттяно. Эряви явомс мель выездной медосмотратнень ютавтоманть туртов таркасто таркас шаштневиця комплекстнэнь рамамонть лангс. Минек тевесь – явомс весе эрицятненень вадря диагностика ды шкастонзо лецямо», – мерсь Артём Здунов.
Мордовиянь Прявтось тешкстызе паллиативной лезксэнь вадрячинь кастомань, истя жо СВО-нь участниктнень реабилитациянь эрявиксчинть – те енксось улезэ прявтокс медицинань весе учреждениятнесэ. Кавто иетнень перть федеральной программанть коряс республикасонть рамазь оборудованиянь 460 единицат 420 млн целковойтнень питнесэ, панжозь реабилитациянь колмо отделеният. Тедеде рамавить оборудованиянь эште 100 единицат 120 млн целковойтнень питнесэ. «Марян паро валт боецтнэнь, сынст семиятнень пельде, эряви ванстомс те лувонть. Покш сюкпря минек земляктнень те категориянть марто важодеманть кисэ», – тешкстызе Артём Здунов.
Маласо шкантень шумбрачинь ванстомань региононь системанть туртов прявт тевтнень ютксо Мордовиянь Прявтось тешкстызе: Республикань онкологиянь диспансерэнь витнеманть, Верень службань одкстомтоманть, конась ветяви Россиянь Президентэнть кармавтоманзо коряс, медицинань профилактикань ванноматнень ламочист ды вадрячист кастоманть, Вейкине централизованной информационной системантень ютамонть, федеральной средстватнень явовтомаст коряс важодемань виевгавтоманть ды кадратнень улеманть.
Коллегиянть прядовомга Артём Здунов явшесь государственной наградат ды евтась сюкпря Мордовиянь медиктненень вадря важодеманть кисэ: «Арсян весенень тенк шумбрачи: тынь казтядо сонзэ ломантненень, максозо Пазось, сон улезэ тынкак!»
Мордовия Республикань Прявтонь пресс-службась