Мордовиясо Наставникень ды педагогонь иень цетавкстнэнь евтызь ацамковонь 21-це чистэ Саранскойсэ «Высота» Тонавтнемань од куншкакуросонть. Кенярксчинь мероприятиясонть ульнесь Мордовиянь Прявтось Артём Здунов.
Пурнавозетненень пшкадсь Россиянь просвещениянь министрась Сергей Кравцов. Сон тешкстызе: Педагогонь ды наставникень иень прявт тевесь – тешкстамс педагогонь профессиянь престиженть. Иенть перть масторонть келес ютавтовсть малав 7 тежат мероприятият. Путозь ушодкс ламо од койтненень, сынст ютксо вейкесь – «Сюкпря тонавтыцянтень» весероссиянь акциясь.
«Эште ие минь эринек минек Президентэнть ветямонзо ало, сонзэ ушодксонзо коряс топавтано образованиянь коряс весе проекттнэнь. Иесь ульнесь редявикс ды сюпав!» – мерсь Артём Здунов.
Тешкстазель, регионсонть покш важодема ветяви эйкакштнень ды од ломантнень шкинемаст редямонь ды кастомань-кепетемань коряс – республикась масторонть омбоце те енкссонть. Покш вийть путовить эйкакштнень спортонь ерокчист редямонть коряс. «Косо бу ломанесь аволизе невте эсь прянзо, прявтось – кадовомс ломанекс. Минек республикань школатне тень топавтыть вадрясто», – пшкадсь педагогтненень ды наставниктненень Мордовиянь Прявтось.
Артём Здунов тешкстызе: те иесь редявикстэ кастызе од педагогтнень ютксо тонавтыцянь тевень престиженть – педагогонь специальносттнес каязь яволявтоматне кассть 10%. Седе ламо студентт ушодыть важодеме профессиянь коряс уш меельце курстнэсэ. Тедеде малав 700 студенттнэ тешкстасть целевой договорт, сынст уш ули сы шкань важодемань таркаст. «Ломантне кемить профессиянтень, неить эйсэнзэ эсь вандынь чинть», – мерсь сон.
Мордовиясо свалшкане одкстомтови образованиянь организациятнень инфраструктурась. Тедеде федеральной бюджетстэ явовтозь 3,5 млрд целковойть – школатнень педе-пев витнемантень, од оборудованиянь путомантень, тонавтоматнень ды стажировкатнень анокстамонтень. Теезь 159 касомань точкат – 90% школатнесэ.
Пек редявикс важодема ветяви рузонь территориятнесэ, конат одс совасть Россияс. Херсонской областень Каланчакской округсонть важодить республикасто педагогт ды активистт, конат вадря тевтнень вельде невтить Россиянь питнейчитнень, кастыть-тонавтыть минек масторонь алкуксонь эрицят.
«Арсян, весе изнявкстнэ, истя жо экономикасо ды промышленностесэ, чачить самай школасо. Минек Президентэсь аволь умок мерсь, раськеютконь уровнясо весе войнатнесэ ды покш аладямотнесэ изнить самай тонавтыцятне. Сюкпря тынк паронь кандыця ды аволь шожда важодеманк кисэ!» – мерсь Артём Здунов.
Республикань Прявтось явшесь государственной наградат педагогической ды воспитательной важодемасо изнявкстнэнь кисэ, истя жо сюкпрянь евтамонь сермат «Профессионалы» професиональной ерокчинь коряс чемпионатонь финалисттнэнень ды сынст наставниктненень.
Сы иесь масторсонть яволявтозь Семиянь иекс, республикасонть – Важодемань династиятнень иекс, башка тешкстазель педагогонь династиятнень питнейчись. Профессиянтень кемевиксчинть ды эйкакштнень кастомантень-тонавтомантень путовксонть кисэ казезь Капкаевтнень семиясь. Династиясь вети ушодкс 1893 иестэнть саезь, лововить 25 педагогт.
Республикань тонавтыцятненень ды наставниктненень поздоровт истя жо евтась Саранскоень ды Мордовиянь митрополитэсь Зиновий. Сон тешкстызе: тедеде путозь ушодкс ламо тевтненень, сынь, нама, кандыть лезэ эйкакштнень ды од ломантнень тонавтомань-превс путомань тевентень, свалшкань духовно-нравственной питнейчитнень кемекстамонтень.
Педагогонь ды наставникень иенть прядовомга республикань тонавтыцятне макссть школань баягинень гайневтема. Ансяк педагогтнень важодемась тень лангс а прядови, эдь профессиясь ульнесь ды кадови сехте эрявиксэкс ды мелень явовтыцякс.
Мордовия Республикань Прявтонь пресс-службась