Таштамковонь 9-це чистэ Мордовияв важодемань содавтома марто сакшнось Россиянь Федерациянь Просвещениянь министрань васенце полавтыцясь Дмитрий Глушко. Республикань Прявтонть Владимир Волковонь, МР-нь Правительствань Председателень полавтыцянть Галина Лотвановань, МР-нь Образованиянь министранть Галина Явкинань марто сон якась Ицял ёнксонь Рождествено ды Оброчное велень школатнес, тосо инжентень невтизь школань столовойтнень ды теплицатнень.
Рождествено велень школась – Ицял енкссо сехте таштотнестэ вейкесь. Тесэ тонавтнить 218 эйкакшт, 52-тнень школань автобуссо усксить шабра велетнестэ.
Школав совамсто Дмитрий Глушконень ды Владимир Волковнень онкстызь температураст ды ютавтсть кедень дезинфекция – весемесь санитарно-эпидемической вешематнень коряс. Инжетне ваннызь 80 таркас школань столовоенть, сон витнезь «Здоровое питание» программанть коряс. Нупалесь покш ды валдо.
Школань прявтось Сергей Учеваткин ёвтнесь, весе тонавтницятне андовить пси ярсамопельде. Сывеленть рамсить «Оброченский» сывелень комбинатстонть, ловсонть – «Ичалковский» сырань теемань комбинатстонть, эмежтнень – 80% эсест пирестэ. Школанть ули пель гектаронь покшолмасо пирезэ, косо путозь 2 теплицат.
Дмитрий Глушконень невтизь тонавтнемань класстнэнь. Тедеде школасонть карми важодеме «Точка роста» цифровой ды гуманитарной профилень тонавтнемань куншкакурось. Школасо важодицятнень марто кортамсто Россиянь Федерациянь Просвещениянь министрань васенце полавтыцясь кевкстнесь, кода школасонть ладязель дистанционной тонавтомась, ульнесь-арасель эйкакштнень интернетэст. Школань прявтось Сергей Учеваткин тешкстызе, весе эйкакштнень ульнесь интернетэст. Сеть семиятнес, косо арасельть компьютерт, максокшнызь школань ноутбуктнень.
Оброчнойсэ инжетне ваннызь школань сад-пиренть ды колмо теплицатнень, кавтотне эйсэст – уштовить. Теплицатнесэ кенерить помидорат, перецт, сонсь школась ваясь цеця потс. «Те Россиясо сехте цецяв школа!» – мерсь Дмитрий Глушко.
Россиянь Федерациянь Просвещениянь министрань васенце полавтыцясь теевсь содавиксэкс «Точка роста» куншкакуронть марто, конась панжозь Оброчноень школасонть. Сон теезь «Образование» нацпроектэнь «Современная школа» федеральной программанть лувсо.
Кода ёвтнесь школань прявтось Вера Шарова, Оброчноень школасонть тонавтнить 188 эйкакшт, 25-тнень школань автобуссо усксить маласо сисем велетнестэ.
Теде мейле инжетне валгсть школань столовойс – валдо, вадря столь-озамо марто. Оброчноень школасонть, кода республикань весе школатнесэ, питневтеме пси ярсамопельсэ андовить 1-4 классо тонавтницятне, истя жо малообеспеченной семиясто эйкакштне. Ярсамопелень пидемстэ тевс нолдавить местной производительнень продуктатне, эмежтне – школань пирестэ. Столовойсэ эйкакштне ярсасть ямдо, модамарь марто котлетадо, салатто ды йогуртто. Дмитрий Глушко ды Владимир Волков эйкакштнень марто вейсэ варчизь ярссамопельтнень. «Пек вадря ямось! Весемесь тантей», – мерсь Дмитрий Глушко. Мордовиянь Прявтось ды Россиянь Федерациянь Просвещениянь министрань васенце полавтыцясь пандызь обедэст школань столовойсэ.
Россиянь Федерациянь Просвещениянь министрань васенце полавтыцясь макссь вадря питне Мордовиясо школасо пси ярсамопелень анокстамонть коряс. «Неян, те важодемась ушодовсь аволь таштамковонь васенце чистэнть, а уш зярыя иеде икеле. Те сеске неяви. Россиянь Президентэнть Владимир Путинэнь 1-4-це классо тонавтницятнень пси ярсамопельде питневтеме андоманть коряс кармавтоманть топавтомга важодемнаь прявт енксокс карми комплексной программатнень кемекстамось, – мерсь Дмитрий Глушко. – Неть школатнень лангс ванозь неяви, те ёнкссо важодемась ладязь пек вадрясто. Ярсамопелесь пидеви тесэнь велень хозяйствань продукциясто – те продукциянь вадрячинть мельга ваномась, важодемань башка таркат. Ярсамопелень вадрячинзэ мельга ваныть теятне-аватне, эряви кирдемс мартост сюлмо».
Россиянь Федерациянь Просвещениянь министрань васенце полавтыцясь ёвтнесь школасо ярсамопелень коряс тетятненеь-аватнень марто сюлмавомань од сервисэнть коряс, конась нолдави Госуслугань порталсонть. Дмитрий Глушко мерсь, сы шкастонть эряви топавтомс покш важодема тонавтнемань учреждениятнень инфраструктурань виевгавтоманть коряс: одкстомтомс пищеблоктнень, столовойтнень материально-технической базанть, сынь ладявольть Роспотребнадзоронь весе вешематненень. Сон истя жо тешкстызе, эряви свалшкане кастомс квалификацияст сеть важодицятненень, кить анокстыть школань ярсамопеленть. «Прявтось, те яросамопелесь улезэ вадря, продуктатне – свежат. Монень маряви, Мордовиясо тень коряс путозь кеме юр, ули мезес тонавтнемс федеральной министерствантень ды лия регионтнэнень», – тешкстызе Дмитрий Глушко.
Мордовиянь Прявтось Владимир Волков башка тешкстызе, образованиянь системанть икеле течи аштить покш тевть од ломантнень трямост-превс путомаст коряс. «Те тевенть тешкстызе Россиянь Президентэсь Владимир Владимирович Путин. Эйкакштне содаст, кода касы-кепети неень шкань производствась, кода вадря важодемс промышленностесэ, велесэ, строительствасо. Ней минек масторсонть, кода весе масторлангонть келес, школатнесэ васенце таркас лиси трямонь-тонавтомань кевкстемась. Прявтось – кастомс ды трямс-тонавтомс шумбра ломань. Вадря ярсамопелесь тенень лезды», – тешкстызе Владимир Волков.