Республикань стендэнть икеле чоп важодсь эрзянь ды мокшонь кельтнень школась. Инжетненень меревсь ванномс эрзянь ды мокшонь кельтнесэ учебно-методической, художественной ды просветительской литературанть, примамс участия М.Е. Евсевьевень лемсэ Мордовиянь педагогической университетэнь пельде эрьва кодат интерактивтнесэ ды мастер-класстнэсэ.
Од инжетне теевсть содавиксэкс эрзянь ды мокшонь азбуканть марто, налксесь столь экшсэ налксематнесэ ды кандовсть «По страницам народных сказок» online-путешествиянтень.
Кенярксчинь ежо весе инжетненень казсть «Умарина», «Эряма», «Азорава» ансамблятне.
Эрзянь ды мокшонь кельтнень весероссиянь чинть кенярксчинть лувсо панжизе «Мерема» этнографической фольклорной группась.
«Васенцеде минь ютавтано истямо мероприятия, сонзэ темазо пек эрявикс - «Мордовские языки в информационном пространстве». Мон евтан поздоровт тынк ютксто эрьвантень, те культурань покш тев Мордовиянь эрямосо», – мерсь Мордовия Республикань культурань, раськень политикань ды архивень тевень министрась Светлана Баулина.
Светлана Никитовна ловнынзе региононь Прявтонть Артём Здуновонь шумбракстнемань валонзо:
«Эрзянь ды мокшонь кельтнень тешкстамось кармась вадря коекс минек ламо раськень государстванть туртов. Малав эрьва регионсонть улить ломанть, конатнень туртов эрзянь эли мокшонь кельтне – тиринь. Пшкадян сюкпрянь вал марто весенень тыненк, кие вечксы ды вансты эсь келенть, культуранть, койтнень-кирдатнень. Тиринь келентень вечкемастонть ушодови патриотизмантень, Тиринь масторонтень вечкемантень тонавтомась. Кельсэнть ванстовить пингень превейчись ды покштятнень-бабатнень оймень сюпавчись. Мордовиясо ветяви покш важодема кельтнень, раськень культуранть ды койтнень-кирдатнень ванстоманть ды виевгавтомань коряс. Тенень лездыть государственной программань мероприятиятне, истя жо эрьва кодат фестивальтне ды кенярксчитне. Евтан весенень поздоровт эрзянь ды мокшонь кельтнень чинть кувалма! Кадык эрьва кудосонть карми вейкень-вейкень чарькодема, вечкема ды паро эрямо. Сестэ карми лембе минек вейсэнь кудонь – ине Россиянь – эрьва эрицянтень».
Эрзянь ды мокшонь кельтнень, культурань ды койтнень-кирдатнень ванстомантень путовксонть кисэ Мордовия Республикань Прявтонь Благодарностть максозь: Челяба ошонь «ИНЕНАРМУНЬ» Эрзянь-мокшонь НКЦ-нь руководителентень Ольга Лысенкованень, Нижний Новгород ошонь «Местная мордовская национальная автономия» общественной организациянь председателентень Ольга Панованень, Татарстан Республикань Эрзянь-мокшонь НКА-нь председателентень Наталья Савитованень ды лиятненень.
Кенярксчись прядовсь «Умарина» моронь ды киштемань государственной ансамблянть пельде «От Мокши до Суры» концертэнь программасонть.
«Истя теевсь: минек мамторось ламо раськень, ды эрьва раськенть ули эсензэ ламо пингень историязо, сонзэ эйстэ тееви Россиянь вейсэнь историясь. Кода вишка, истя жо покш раськетнень кельтнестэ, койтнестэ-кирдатнестэ тееви минек масторонь культурась. Миненек эряви теемс условият эрзянь ды мокшонь кельтнень ванстоманть туртов. Те государствань ды весень минек тевесь», – тешкстызе Россиянь Федерациянь Федеральной Собраниянь Федерациянь Советэнь сенаторось Пётр Тултаев.