Пурнавозетненень видеосвязенть вельде пшкадсть Россиянь велень хозяйствань министрань полавтыцясь Андрей Разин ды Мордовиянь пельде Госдумань депутатось, ГД-нь аграрной кевкстематнень коряс комитетэнь председателень полавтыцясь Юлия Оглоблина.
Андрей Разин тешкстызе, Мордовиянтень мереви кирдемс каштанчи эсь агропромышленной комплексэнть важодеманзо кувалма. "Тынк регионось аволь покш, ансяк тынь соватадо саразонь, тувонь сывелень ды алонь производствань покшолматнень коряс кемень сехте вадрятнень юткс. Те пек покш цетавкст», – мерсь сон.
Министрань полавтыцясь тешкстызе отраслянь виевгавтомантень Мордовиянь Прявтонь мелень явоманть. Мелят республикасонть саезь од рекорд сюронь урожайностень ды валовой пурнамонть коряс – пивсэзь кавто миллионт тоннатнеде седе ламо. «Тынь икельдинк меельце иетнень сехте вадря невтевкстнэнь, те корты системань важодемадонть», – тешкстызе Андрей Разин.
Велень хозяйствань свалшкань енкстнэде башка Мордовиясь виевгавты одтнэнь – невтемакс, органической сокамонть-видеманть, сонзэ коряс республикань Прявтось пачтясь масторонь Президентэнтень Владимир Путиннэнь.
Мелят «Сырнень сексь» агропромышленной выставкасонть региононь стендэнтень сакшность пек ламо ваныцят, республикась изнясь 31 награда, сынст ютксто 25-тне – сехте покшт, истя жо саизе выставкань виевгавтомантень путовксонть кисэ Гран-принть.
Министрань полавтыцясь пачтясь Артём Здуновнень сюкпрянь валт федеральной аграрной ведомствань руководителенть Дмитрий Патрушевень пельде, истя жо евтась покш сюкпря «Россия» раськеютконь выставкасонть-форумсонть Мордовиянь стендэнть ды кудонь ракшатнень туртов коське коромонь производствань коряс проектэнь нолдамонть кисэ.
Госдумань депутатось Юлия Оглоблина евтась сюкпря Мордовиянь аграрийтненень важодеманть кисэ, од изнявкстнэнь кисэ, евтнесь комитетэнь законотворческой важодеманть коряс, конась аравтозь велень хозяйствань производительтненень лездамонтень.
Республикань агропромышленной комплексэнь важодемань невтевкстнэде пачтясь МР-нь велень хозяйствань ды продовольствиянь министрась Антон Илюшкин. Сон тешкстызе, Мордовиянть – вадря экспортонь потенциалозо. «Республикась топавты аволь ансяк эсензэ потребительской вешеманть сывелень, ловсонь, алонь ды эмежтнень коряс, истя жо микшни нолдавиця продукциянть лия регионтнэс ды лия мастортнэс. 2023 иенть перть АПК-нь продукциянь экспортонь покшолмась кармась 63,5 млн. США-нь долларт. Прявт партнертнэ - те Казахстан ды Беларусь. Пек перспективной КНР-нь рынкась», – мерсь министрась.
Чаунзань енксонь КФХ-нь прявтось Ирина Ямашкина евтнесь модамарень кастомань коряс фермерэнь хозяйствань теемань ды виевгавтомань опыттэнть, тешкстынзе талновтыця кевкстематнень, конатнень марто савкшны вастовомс аграрийтненень.
Артём Здунов тешкстызе: продовольствиянь безопасностень ды велень хозяйствань производствань виевгавтомань темась – масторонть келес сехте прявттнэстэ вейкесь. Региононь руководителесь кармавтсь явомс мель зярыя енкстнэнь лангс, конат прявтт неень шканть туртов. Сынст ютксо – эпизоотической вадря тевтне, сынст эряви ванстомс, тень туртов ютавтови кудонь нармунтнень вакцинациясь. Эште вейке енксось – велень хозяйствань кооперациянь виевгавтомась. Истя жо путови тев оптово-распределительной куншкакуронь теемань коряс, конась карми рамсеме КФХ-тнень ды ЛПХ-тнень кедьстэ велень хозяйствань продукциянть. «Те проектэнть эряви кирдемс, тонавтнемс инструменттнэнь, конатнень вельде сон топавтови», – тешкстызе Артём Здунов.
Коллегиясонть явшезь государственной ды ведомственной наградат. Казезетнень ютксо - Ковылкинань енкссто КФХ-нь прявтось Алексей Кулагин, Теньгушевань енкссто КФХ-нь прявтось Владимир Ащев, «Октябрьская» агрофирмань птицефабрикатнень операторось Геннадий Чугунов, Ельникень енкссто машинасо потявтомань операторось Любовь Кнакнина, Кочкуровань енкссто механизаторось Николай Беззубов, Краснослободской енкссто механизаторось Виктор Дуркин, Рузаевкань енкссто телятницась Татьяна Дивеева.
Мордовия Республикань Прявтонь пресс-службась