Республикань руководителень программань васенце пунктокс кармась Рождество-Богородичной Санаксарской церань монастырень газонь котельноень нолдамось. Мероприятиясь ютавтовсь Петербургонь раськеютконь газонь форумонть лувсо. Видеосвязенть вельде ютавтовсь Россиянь 18 регионтнэсэ, истя жо Мордовиясо, потребительтненень газонь максоманть туртов од объекттнэнь панжомань кенярксчинь церемониясь. Шумбракстнемань вал марто церемониянь участниктненень пшкадсть Россиянь Федерациянь Федеральной Собраниянь Федерациянь Советэнь Председателесь Валентина Матвиенко, РФ-нь Энергетикань министрась Николай Шульгинов, «Газпром» ПАО-нь Правлениянь председателесь Алексей Миллер, «Газпром межрегионгаз» ООО-нь генеральной прявтось Сергей Густов.
Мордовия Республикась истя жо лиссь сюлмавомантень – региононь руководителесь Артём Здунов евтась сюкпря «Газпромонтень» вейсэнь важодеманть кисэ. Республикасонть газификациясь кармась 94%. Ансяк догазификациянь программанть коряс газось ветяви малав 5 тежат кудотнес.
Санаксарской монастыресь - весероссиянь покшолмань обитель, культурань сюпавчинь объект. Те таркась сюлмавозь минек масторонь ине историянть ды ине изнямотнень марто – тесэ эрямонь меельце иетнень ютавтынзе а изнявиця адмиралось, минек флотонь ды минек республикань иневанькс ванстыцясь Фёдор Ушаков. Ней неть таркатне – «Арзамас-Дивеево-Саров» паломникень-туристэнь федеральной покш кластерэнь пелькс.
«Покш сюкпря историянь питнейчитнень ды койтнень-кирдатнень ванстоманть кисэ – Мордовиянь эрицятнень, паломниктнень ды инжетнень, монастырень братиянть, весень минек пельде», – видеонть коряс кортамсто тешкстызе Артём Здунов.
«Проектэнь весе участниктненень ды топавтыцятненень - Пазонь баславамот. Ванстозо Пазось весень», – мерсь Саранскоень ды Мордовиянь митрополитэсь Зиновий.
Ледстясынек, Санаксарской монастырень газификациядо кевкстеманть кепедекшнызе Артём Здунов, зярдо сон аравтозь Мордовиянь Прявтокс.
«Газификациянь се уровнянть пингстэ, конась ули республикасонть (минь соватано масторонь вете сехте вадря регионтнэнь юткс), а ветямс газ культурань сюпавчинь истямо объектэнтень, кода Санаксарской монастыресь, ульнесь аволь виде. Мон пшкадинь «Газпром» ПАО-нь, ды минь вейсэ витинек те тевенть. Сюкпря «Газпромонтень» лездамонть кисэ», – мерсь Артём Здунов.
Мордовия Республикань Прявтонь пресс-службась