Ялгасо производствань од площадканть одкстомтомань ды вельмевтемань коряс тевтнень компаниясь ушодынзе 2022 иестэ. Васняяк одкстомтозь оборудованиясь, те лездась покшолгавтомс линиянь производительностенть. Од площадкань панжоманть вельде нолдавиця продукциянь покшолматне кастовить 2,5-ксть.
Артём Здунов ваннынзе предприятиянь производствань линиятнень, истя жо лия енов а молиця лабораториянть, конань арасть аналогонзо масторлангонть келес, конась лезды редямс продукциясонть 1,5 тежат човорявкст. «МордовАлкоПром» ООО-нь генеральной прявтось Евгений Сидоров толковизе, Россиянь лия регионтнэсэ, истя жо западонь мастортнэсэ истят жо предприятиятнесэ редявить човорявкстнэнь ансяк 22 видт. Сон истя жо евтнесь возможносттнеде, конат панжовить холдингенть икелев производствань покшолматнень келейгавтоманть вельде. «Те лезды тенек зярыяксть покшолгавтомс производстванть ды миематнень Россиянь рынкасонть. Текень марто тесэ теевить важодемань од таркат», – тешкстызе Евгений Сидоров.
«Саранский» заводось республикань зярыя предприятиятнень ютксо ули АПК-со прявт енкстнэстэ вейкенть топавтомасо – органической продукциянь производствасо. Предприятиянть – масторлангсо вейкиненть – ули Россиянь Федерациянь, Евросоюзонь ды США-нь Национальной органической стандартонь вешематненень ладиця сеске колмо органик-сертификациянзо. 2018 иестэ «Саранский» ЛВЗ-сь кармась Россиянь Федерациянь Правительствань вадрячинь коряс премиянь лауреатокс, совась экономикань эрьва кодат отраслятнестэ 12 изницятнень юткс. Предприятиянтень свалшкане максовить покш казнеть «Сырнень сексь» весероссиянь агропромышленной выставкасонть.
Артём Здунов ваннынзе производствань весе пелькстнэнь ды кортась предприятиянь важодицятнень марто. Течи тесэ важодить 662 ломанть. Средней зарплатась – 56 тежат целковойть, те иень 9 ковтнень перть касомась кармась малав 20%. Бюджетэнь весе уровнятнес пандозь 9 млрд целковойтнеде седе ламо налогт. Продукциясь пачтяви Средней Азиянь ды малавикс зарубежьянь мастортнэс, истя жо Китаев. Заводось кирди важодемань сюлмот Рузаевкань суликань заводонть марто, рамси тосто 87% весе эрявикс таранть эйстэ.
Мордовия Республикань Прявтонь пресс-службась