Тесэ вадря лувсо эйкакштненень мереви веселасто ды лезэвстэ ютавтомс шканть: налксемань лувсо теевемс содавиксэкс вейкень-вейкень марто, кастомс-кепетемс командасо кортамонь ды важодемань ерокчитнень. Башка енксось – эйкакштненень психологической лезксэсь. Проектэнть ушодовомсто саезь «Тонкой материясо» ютавтовсть психолог марто 15 вастовомат, 20 налксемат ды ошонь ды республикань содавикс ломантнень марто 10 аволь седе аламо вастовомат.
Даволковонь 6-це чистэ проектэнь участниктнень марто вастовсь Мордовиянь Правительствань Председателень полавтыцясь Наталья Таркаева. Тейтерькатнень ды церынькатнень марто нурькине содавтомадонть мейле вастовомась поладовсь панжадо дискуссиянь лувсо. Эйкакштне кевкстнесть эрьва мезде: Наталья Таркаевань ванновтозо неень шкань образованиянть, спортонть, туризмань виевгавтоманть ды тиринь енкссо туристической туртнэнь ютавтоманть туртов лия енов а молиця налксематнень коряс.
Сехте эрявикс профессиянь коряс кевкстеманть лангс Наталья Таркаева мерсь: ней сон кочкавользе бу биохимиянть. Те енкссонть покш перспективат – ковидэсь тень невтизе. Целанек жо, республикасонть а сатыть кадрат, те тевенть витеманзо туртов анокстазь кадрань стратегия.
«Ней научной специальностне седе мельстуицят, сынь максыть ламо возможность. Варчинк эсь прянк – якседе практикав эрьва кодат предприятиятнес. Те лезды муемс эсь прянть», – тешкстызе сон.
Эйкакштне кевкстнесть, кодамо образования эряви получамс, штобу важодемс властень органтнэсэ. Вице-премьерэсь мерсь: эряви улемс профессионалокс эсь тевсэнть. Сон истя жо евтнесь, кода ютавтни важодемадо мейле ютко шканть, ды кодамо спортонтень яви мель – Мордовиясо тень туртов теезь весе условиятне.
Од ломантне кевкстнесть: теевить-арась истят таркат ошонь лия микшнемань куншкакуротнесэ? Наталья Александровна тешкстызе: Мордовиясо ули истят клубтнень теемань вадря опыт, секскак практикась ули ламолгавтозь.
МР-нь Региононь сервисной уполномоченноесь Елена Семелева евтась сюкпря эйкакштненень ерокчинть ды евтазь мельтнень-ванновтнень кисэ: «Кеман, весе тынк ушодкстнэ улить топавтозь Мордовиясо. Ды тынь кадовтадо тиринь республикасо сынст шаштомаст туртов».
Мордовиянь Прявтонть Артём Здуновонь пельде Наталья Таркаева пачтясь «Тонкая материя» таркантень ды тов яксицятненень казне - настольной хоккей.
Мордовия Республикань Прявтонь пресс-службась