Боевой тевдеематнень, локальной войнатнень ды военной аладямотнень ветерантнэнень, геройтнень аватненень, нитненень ды эйкакштненень пшкадсь Мордовиянь Прявтось Артём Здунов. «Течи минь покш масторонть марто вейсэ тешкстатано сеттнень, кие алкуксокс топавтсь служебной, воинской долгонть Тиринь масторонть томбале, кие ульнесь кемевикс присягантень ды сермадызе эсь лемензэ Россиянь воинской славань историянтень. Эрьва ие яла седе васов туи Афганонь войнань гайтесь, ансяк Россиянь эрицятне зярдояк а стувтсызь воинтнэнь-интернационалисттнэнь ине тевест. Минь евтатано ризксэнь валт весенень, кие емавтынзе те войнасонть малавиксэнзэ, ялганзо, вейке полксо служицятнень. Течи минь сюконятано специальной военной операциянь участниктнень мужестваст, героизмаст, цидярдомаст икеле. Минек боецтнэ ванстыть Россиянь суверенитетэнть ды мельтнень-ванновтнень, кода 35 иетнеде икеле тень теиде тынь. Покш сюкпря тенк: тынь кирдтядо ды лездатадо минек цератненень, кить ней туить СВО-нь. Сынь кемить эсь прянтень ды молить изнямо. Евтан седейшкавань сюкпря весенень, кие полады важодеме ветеранонь организациятнесэ, вети од ломантнень военно-патриотической, духовной лувсо тонавтоманть-превс путоманть, тонавты эйкакштнень вечкемс Тиринь енксонть ды улемс кемевиксэкс долгонтень», – тешкстызе Артём Здунов.
Региононь лидерэсь тешкстызе, боевой тевдеематнень ветерантнэнень мелень явомась, сынст мелест-ванновтост ванстомась седе товгак кадови Мордовиянь социальной политикань прявт тевтнестэ вейкекс. Истямо тев путы Россиянь Президентэсь Владимир Путин.
Весе пурнавозетненень поздоровт истя жо евтась Войнань, трудонь, Вооруженной вийтнень ды правань ванстомань органтнэнь ветерантнэнь Весероссиянь общественной организациянь Мордовия республикань общественной организациянь Председателесь Иван Цыганок: «Седейшкавань сюкпрянь валт весенень тенк, минек вечкевикс ветерант, честенть ды мужестванть, воинской присягантень кемевиксчинть, Тиринь масторонтень покш вечкеманть кисэ. Миненек а мереви зярдояк стувтомс теде. Минек седейтнесэ кармить эрямо геройтнеде ледстнематне ды пачтявомо эйкакштненень ды нуцькатненень».
Кенярксчинть лувсо явшевсть наградат. Ероков общественной тевдееманть ды эйкакштнень военно-патриотической лувсо кастомантень-превс путомантень покш путовксонть кисэ «За заслуги перед Республикой Мордовия» медальсэ тешкстазь «Боевое братство» ветерантнэнь Весероссиянь общественной организациянь Мордовия республикань отделениянь исполнительной комитетэнь председателесь Фаиль Жалимов. «35 лет со дня вывода советских войск из Афганистана» медальсэ казезь Афганистан Республикасо боевой тевдеематнень участникесь Вячеслав Лентов. Истя жо явшезь Мордовия Республикань Почетонь грамотат, Мордовия Республикань Прявтонь Благодарностть ды ледстнемань казнеть.
Кенярксчинь мероприятиясь поладовсь «Афганонь гайть» Военно-патриотической моронь республикань фестивалень гала-концертсэнть, конась ютавтови Мордовиянь Прявтонть лезксэнзэ пингстэ. Эрьва ие сон пурны сядот морыцят, 10 иестэ саезь ды седе покшт. Весемезэ фестивалень ютавтомань иетнень перть сценанть лангс лиснесть 4 тежадо седе ламо участникть, морасть 700 од морот.