Бульварось кандтни Советской Союзонь Героенть Павел Цаплинэнь лементь – 1936 иестэ танконь бригаданть юрсо ульнесь Мадрид ало ды Теруэльской енкссо тюрематнесэ, невтсь мужества ды а пелемачи. Ине Отечественной войнасо Изнямонь 40-це иетнень каршо бульваронтень, конантень максозь сонзэ лемезэ, путозь Т-34 танкось. Ледстнемань монументэсь путозь Мордовиянь тылэнь важодицятнень лемс, конат пурнасть 36 миллионт целковойтнеде седе ламо «Мордовский колхозник» танконь колоннань строямонть лангс.
Общественной таркантень умок эрявсь одкстомтома. Мелят Цаплинэнь бульварось изнясь Россиянь Президентэнть мелензэ коряс топавтовиця нацпроектэнь рейтингень вайгелень максомасонть. Сонзэ кисэ вайгелест максызь ошонь малав 20 тежат эрицятне. Малав 22 тежат кавонзазь метратнень лангсо одкстомтозь валдомтомась, путозь ялго якамонь од яннэть, теезь эйкакшонь ды спортонь площадкат, озавтозь чувтт-куракшт. Бульварсонть истя жо теезь Павел Цаплинэнь эрямодонзо кулянь максомань тарка.
Скверэнть ванномо сась Мордовиянь Прявтось Артём Здунов.
«Поладтано топавтомо минек Президентэнь кармавтоманть ошонь вадря средань теемань коряс программанть лувсо. Меельце шкастонть малав 400 миллионт целковойть путынек общественной таркатнес, кудотнень перька таркатнес, 40 миллионт путозь бульваронь одкстомтомантень, – мерсь республикань руководителесь. – Сехте прявтось – сон вечкеви ошонь эрицятненень, сонзэ ули историязо. Паркось истямо тарка, конась служи весень туртов, секскак эряви сонзэ ванстомс!»
Тешкстасынек, Саранскоень од артыцятнень мелест коряс Веселовской курованть 27№ кудонть лангс артозь танкистэнть Цаплинэнь портретэсь. Те неень шкань тев масторонь геройтнень ине тевдест ледстнематнень ванстомаст коряс.
Артём Здунов ютась бульварганть, ваннынзе топавтозь тевтнень, кортась эрицятнень марто, макссь зярыя кармавтомат Саранскоень Прявтонтень Игорь Асабиннэнь, сынь токшить бульваронь пижелгавтоманть ды сонзэ маласо тарканть седе тов вадрялгавтоманть-мазылгавтоманть.
Ледстясынек, меельце колмо иетнень перть ансяк Саранскойсэ нацпроектэнть лувсо вадрялгавтозь-мазылгавтозь кудотнень перька 95 таркат ды кото общественной таркат.
Мордовия Республикань Прявтонь пресс-службась