Эрьва иетнестэ фестивалень художественной руководителекс ульнесть Россиянь народной артистэсь, «Золотой саксофон России» Георгий Гаранян ды Мордовиянь заслуженной артистэсь Александр Курин, истя жо пианистэсь, Россиянь народной артистэсь Даниил Крамер. Ней – содавикс саксофонистэсь ды продюсерэсь, Россиянь ды Мордовия Республикань народной артистэсь Игорь Бутман.
Сундерьковонь 6-це чистэ концертэсь ютавтови Л.П. Кирюковонь лемсэ Саранскоень музыкальной училищань Концертэнь покш залсонть. Сценанть лангсо кармить улеме «Саранск» Биг-бенд джазонь оркестрась, истя жо джазонь коллективтне Самарасто, Пензасто, Ульяновскойстэ. Фестивалень инжетнень туртов анокстазь культурань мельстуиця программа. Ушодови 17 чассто.
Сундерьковонь 7-це чистэ фестивалесь поладови И.М. Яушевень лемсэ Государственной музыкальной театрасонть, косо эсь программанзо невтсы Игорь Бутманонь квинтетэсь. Квинтетэнтень совить - саксофонистэсь Игорь Бутман, пианистэсь Олег Аккуратов, гитаристэсь Евгений Побожий, барабанщикесь Эдуард Зизак ды контрабасистэсь Артём Баскаков. Концертэсь ушодови 18 чассто 30 минутасто.
Билеттнэнь мереви рамамс ссылканть коряс - https://clck.ru/35xxTX. Мереви молемс Пушкинэнь картанть коряс.