Ожоковонь 16-це чистэ Мордовиянь Прявтось Артём Здунов вастовсь премиянь ушодыцянть, Region PR общественной сюлмотнень виевгавтомань фондонь правлениянь председателенть Геннадий Шаталов марто. «Республикась кенярды вастомс премиянь участниктнень ды инжетнень. Те «Region PR» фондонть марто минек лезэнь кандыця важодемань поладома, сон 2021 иестэ Саранскойсэ ютавтсь «Маршрут года» ды «Туристический сувенир» весероссиянь премиятнень финалт. Те шканть перть минь редявикстэ шаштовинек туризмасонть – ютазь иенть коряс 1,5-ксть ламолгадсть туристтнэ, конат лоткакшность минек отельтнес», – мерсь Артём Здунов.
Истя, тедеде Мордовиясь ютавтсь «Мы вместе!» Раськень культуратнень весероссиянь од ломанень фестиваль, «Время Героев» фестиваль, «ДЕПО-фест» креативной индустриятнень республикань панжадо фестиваль, «Кургоня» эрзянь-мокшонь инжень вастомань фестиваль ды «Пятнистый фест» гастрономиянь фестиваль.
Геннадий Шаталов тешкстызе, Мордовиянь географиянь таркась, вадря сервисэсь ды событиянь ламо площадкатне – те виев потенциал регионсонть туризмань седе тов виевгавтоманть туртов.
Вастовомасонть кортасть седе тов вейсэнь тевдеемань енкстнэде, конат лездыть Мордовиянтень кармамс седе содавиксэкс туристтнэнь ютксо.
Мордовия Республикань Прявтонь пресс-службась