Неень шкань техникась свал эряви шумбрачинь ванстомантень, образованиянтень – неть отраслятне важодить ломантнень туртов. «Миненек пек лезды од «ГАЗелесь», покш сюкпря минек Президентэнтень весе минек эйкакштнень пельде, – корты Инсаронь школань-интернатонь прявтось Виктор Зарубин. – Минь аволь ансяк усксетяно эйкакштнень интернатс ниле енкстнэстэ, истя жо ардтнетяно экскурсияв, шумбрачинь витемань лагерьтнес. Минек ули эсенек подсобной хозяйства, косо эйкакштне покш мель марто тонавтнить важодеме – од автобусось миненек пек эряви!»
Од автотранспортонть пельде ключтнень явшемась ютавтовсь ацамкомонь 2-це чистэ Саранскойсэ Изнямонь площадьсэ.
«Школань 27 автобуст, конатнес путозь сехте од оборудования, ладить весе вешематненень, штобу кияк мезеяк илязо кола. Те лезды миненек панжомс 12 од маршрутт, ванстомс икеленсетнень. Прявтось: минек эйкакштне ардтнест сэтьместэ, – мерсь Артём Здунов. – Ды медицинань лезксэнь куроксто явомань 12 машинат – сынь лездыть кастомс мобильностенть, медицинань лезксэнь явомань вадрячинть, седе пек велетнесэ. Покш сюкпря минек Президентэнтень Владимир Владимирович Путиннэнь, те программась важоди иеде иес. Карматано учомо од пачтямот».
«Ламо иетнень перть тонавтнемань учреждениятне примить участия «Школьный автобус» программасонть, сон лезды минек эйкакштненень получамс вадря образования апак вано сень лангс, косо сынь эрить, лездыть кастомс сэтьмечинть, – мерсь Оброченской школань прявтось Вера Шарова. – Минек школась базовой, тесэ тонавтнить малав 200 эйкакшт 6 эрямонь пунктнэстэ. Эрьва ие тонавтницятне ламолгадыть. Течи миненек макссть од транспорт. Минь панжтано од маршрут эйкакштнень туртов, карматано ардтнеме экскурсияв, музейс, театрав, республикань эрьва кодат мероприятиятнес. Минек тонавтницятнень, тонавтыцятнень, тетятнень-аватнень туртов од транспортось – сехте питней ды алкуксонь Од иень казне».
Мордовия Республикань Прявтонь пресс-службась