Од ДК-сонть ули концертэнь зал 120 таркас, библиотека, ловномань зал, изостудия, декоративно-прикладной искусствань студия, музей.
Темниковань енксось содавикс культурань, раськень койтнесэ-кирдатнесэ. Тесэ вадрясто важодить шкинемань ламо коллективть, раськень промыслатнень мастерт.
Од ДК-нь ваномань залсонть умарентень а ков прамс – весе эрицятне састь Мордовиянь Прявтонть марто вастовомантень. Артём Здунов евтась поздоровт весе пурнавозетненень веленть туртов истямо покш тевенть коряс.
«Старый Город велесэнть кадовост кезэрень вадря койтне-кирдатне, весе меельценть миненек эряви аламо-аламо одкстомтомс. Мон пек кенярдан: тесэ кармить важодеме шкинемань коллективть, раськень художественной промыслатнень мастерт. Тесэ свал улезэ шкинемань лув, тей сакшновольть од ломантне. Сюкпря минек Президентэнтень Владимир Владимирович Путиннэнь нацпроектэнть кисэ – зяро клубт минь витнинек-петнинек, строинек ды зяро эште тейтяно вейсэ!»
Темниковань енксонь прявтось Олег Родайкин евтась сюкпря республикань руководителентень мелень явоманть кисэ: «Меельце 15 иетнестэ районсонть эзь панжово вейкеяк социальной объект. Минь евтатано сюкпря Президентэнтень, республикань Прявтонтень те казненть кисэ. Кеман, клубось карми кенярдовтомо велень эрицятнень».
Культурань кудонть панжомасо истя жо ульнесть вице-премьерэсь Инсаф Хайруллин ды культурань, раськень политикань ды архивень тевень министрась Светлана Баулина.
Мордовия Республикань Прявтонь пресс-службась