Субутасто, медьковонь 11-це чистэ, тешкстазь вейсладямо Мордовия Республиканть ды «Российский Союз строителей» вейсэндявксонть ютксо. Документэнть алов кедьчелькест путызь Мордовиянь Прявтось Владимир Волков ды Россиянь Строительтнень вейсэндявксонь Президентэсь Владимир Яковлев.
Ёвтызь, тешкстазь вейсладямось лезды вейсэ важодемс зярыя ёнкстнэнь коряс: виевгавтомс республикань строямонь комплексэнть, истя жо – строямонь материалтнэнь нолдамонть, теемс вадря условият отраслянтень инвестияциятнень тердемга ды виевгавтомс конкуренциянть регионсонть.
Строительтнень Россиянь вейсэндявксось – общественной покш организация, ков совитьокругонь, регионъютконь ды региононь 82 вейсэндявкст, истя жо 260 коллективень члент, конат вейсэндить 41000 строямонь организацият, стройиндустриянь предприятият, проектэнь-изыскательской институтт Россиянь Федерациянь 80 субъекттнэсэ.
РСС-сь кирди сюлмот Россиянь Правительстванть, Федерациянь Советэнть ды Государственной Думанть, профилень комитеттнэнь, Россиянь Минстроенть ды Минпромторгонть, Россиянь Федерациянь Трогово-промышленной палатанть ды Россиянь промышленниктнень ды предпринимтаельтнень вейсэндявксонть марто, прими участия законодательной од акттнэнь анокстамосо ды нормативной базанть одкстомтомасо.
Владимир Волков тешкстызе, Строительтнень Россиянь вейсэндявксонть марто вейсэнь важодемась лезды регионтнэнень муемс кить-янт отраслянь виевгавтоманть коряс ды топавтомс стряомонть коряс инфраструктурань покш проектт, сынст ютксо – нацпроекттнэ, конатнень яволявтынзе Россиянь Президентэсь.
Владимир Анатольевич Яковлев. 1996 – 2003 иетнестэ – Санкт-Петербургонь губернатор. 1996 – 2001 иетнестэ – Санкт-Петербургонть пельде РФ-нь Федерациянь Советэнь член. 2003 иестэ – РФ-нь Президентэнть указонзо коряс аравтозь Россиянь Правительствань председателень полавтыцякс. 2004 иестэ – ладязь Югонь федеральной округсо РФ-нь Президентэнь Полномочной представителекс. 2004 иень таштамковонь 14-це чистэ саезь 2007 иень таштамковонь 24-чинть самс – Россиянь Федерациянь Регионтнэнь виевгавтомань министра. 2004-2007 иетнестэ ульнесь РФ-нь Безопасностень советэнь членэкс, 2005 иестэнть саезь совась РФ-нь Президентэнть пингстэ нацпроекттнэнь топавтомань коряс Советэнтень, 2006 иестэнть саезь ульнесь «Доступное и комфортное жилье – гражданам России» нацпроектэнть коряс межведомственной важодемань группань прявтокс. 2009 иень чадыковонь 28-це чистэнть саезь – Россиянь строительтнень вейсэндявксонь президент.
Мордовия Республикань Прявтонть пресс-службась