Итогонь коллегиянтень пурнавозетненень пшкадсь Од ломантнень тевест коряс Федеральной агентствань руководителень полавтыцясь Дамир Фаттахов. Сон тешкстызе: Мордовиясь кассь од ломантнень политикань енкссонть зярыя невтевкстнэнь коряс. Республикась – регионтнэстэ вейкесь, конатненень омбоце ие явови лезкс «Регион для молодых» федеральной программанть лувсо – те малав 200 млн целковойть. «Мордовиясь а лотки тарказонзо! Эскелятано икелев вейкине курсонть лувсо! Сюкпря лездамонть кисэ Мордовиянь Прявтонтень ды Госкомитетэнь весе командантень. Коллегат, истя кирдемс!» – мерсь Дамир Фаттахов.
«Россия – страна возможностей» АНО-нь генеральной прявтонь полавтыцясь Дмитрий Гужеля евтнесь федеральной платформанть минек республиканть марто лезэнь кандыця вейсэнь тевдеемадонть: топавтовить зярыя проектт – весе сынь теить возможность регионсонть эрьва од ломаненть туртов. Вете иетнень перть Мордовиянь 150 тежат од ломантне примасть участия платформань проекттнэсэ ды пелькстамотнесэ, теезь алкуксонь экосистема, виевгавтови Компетенциятненень питнень максомань куншкакурось. «Мордовиянь од ломантнень вейсэндявксось пек вадря! Регионось кеместэ ашти васенцетнень ютксо», – тешкстызе Дмитрий Гужеля.
Мордовиянь волонтеронь тевдеемантень совить малав 60 тежат ломанть. Республикась саи омбоце тарка добровольчествань виевгавтоманть коряс сеть регионтнэнь ютксо, косо эрить 1 млн седе аламо ломанть. Теезь кавто Добро.Центрат, ули касомань-кепетань перспектива – 12 яволявтоматнень коряс ветяви важодема. Тевест топавтыть «Волонтеры Победы» Весероссиянь общественной движениянь муниципальной 19 отделеният - те 7500 участникть.
Мордовиянь Од ломантнень тевест коряс Госкомитетэнь председателесь Анастасия Гришнева эсь пачтямосонзо тешкстызе: республикань од ломанень движениянь прявт тевесь – теемс поколениятнень ютксо домка сюлмо, сестэ од ломантнень смелчись ды виесь кармить важодеме Россиянь вандынь чинть лезэс, теить путовкс масторонь кемекстамонтень.
Кода невтить кевкстнематне, республикань од ломантненень вечкеви ютавтовиця од ломанень политикась, ламолгадсть ломантне, конат а бажить туемс регионстонть. Текень пингстэ ламот а содыть од ломантнень туртов улиця возможносттнеде. Анастасия Гришнева евтнесь: тень витемга тееви «Навигатор возможностей» региононь вейкине порталось.
«Регион для молодых» программанть вельде прядовсь республикань Од ломантнень кудонть педе-пев витнемань васенце пельксэсь. Тедеде арсеви прядомс весе тевтнень. Госкомитетэнь важодемань прявт енкстнэ – гражданско-патриотической ды духовно-нравственной лувсо тонавтомась-превс путомась. Те важодемась ветяви Мордовиянь епархиянть ды Мусульмантнэнь духовной управлениянть марто вейсэ.
Од ломантнень енкссо алкуксонь лидертнэ – Васенцетнень движениясь, конась токши весе республиканть. Башка важодема ветяви стака од ломантнень марто – Движениянтень совавтозь 250 седе ламо истят од ломанть. Лезды тенесэ, истя жо, информационной сэтьмечинь ды од ломантненень психологической лезксэнь куншкакуронь важодемась.
Редявикс эскелькс теезь грантонь тевдеемасонть – изнясь 121 проект вейсэнь покшолмасо 180 млн целковойть, те невтевксэсь мелят кассь нилексть. Республикасонть теезь гранттнэс понгомань туртов яволявтоматнень анокстамонь коряс специализированной куншкакуро.
2024 иестэ, конась яволявтозь Семиянь иекс, Од ломантнень тевест коряс Госкомитетэсь бажи покш мель явомс семиянь питнейчитнень кемекстамонтень: виевгавтови важодемась од семиятнень марто. Уш ней регионсонть важоди семиянь 21 клуб, тедеде панжови семиянь коворкинг. Студотрядтнэнень 65 иетнень топодеманть кувалма ютавтовить зярыя мероприятият.
Кортамонзо прядовомга Анастасия Гришнева евтась сюкпря Мордовиянь Прявтонтень ушодкстнэнь ды свалшкань лезксэнть кисэ. «Мордовиясь – одтнэнь туртов регионось, ды минь тень кувалма кирдтяно покш каштанчи!» – мерсь сон.
Аволь вадря прянь ветямонь профилактиканть коряс кемгавксово иеде седе вишкинетнень ды сынст тетяст-аваст марто межведомственной важодемадонть пачтясь МР-ва МВД-нь общественной порядоконь ванстомань коряс полициянь прявтонь полавтыцясь Владислав Пинаев. Госкомитетэнть пингстэ Важодиця од ломантнень советэнтень совицясь, «Рузхиммаш» АО-нь финанстнэнь коряс экономистэсь Регина Пиногорова евтнесь предприятиясонть од ломантненень лездамодонть. Истя жо кунсолозь пачтямотне од семиятнень марто важодемань сехте вадря практикатнеде ды Эрзянь-мокшонь землячествань од ломанень вейсэндявкстнэнь тевдеемадост.
Саранскоень ды Мордовиянь митрополитэсь Зиновий тешкстызе: эряви вельмевтемс ды кемекстамс свалшкань духовно-нравственной питнейчитнень: «Карматано вельмевтеме кемемань юртнэнь. Миненек эряви вейсэндямс вийтнень – од ломантне иляст понго аволь вадря ванновтнень алов».
Республикань Прявтось, регионсонть ютавтовиця од ломанень политикантень питнень максомсто, тешкстызе: «Минь важодтяно федеральной повестканть коряс, Мордовиянть содасызь, Мордовиянтень лездыть. Од ломантнень тевест коряс Государственной комитетэсь весе смустнесэ – республикань властень сехте од органтнэстэ вейкесь. Апак вано тень лангс, кавто иетнень перть тевдееманть перть од ломантнень ушодкстнэнь виевгавтомантень явозь пель миллиардто седе ламо федеральной ярмакт».
Икеле покш тев – Од ломанень масторлангонь фестивалесь, конась ютавтови минек масторсо эйзюрковсто Россиянь Президентэнть лезксэнзэ пингстэ. Арсеви ютавтомс фестивалень региононь программа - «Жить и работать в России» тематиканть коряс, Од ломантнень тевест коряс федеральной агентстванть лезксэнзэ пингстэ Мордовиясь вастсынзе Китайстэ од предпринимательтнень. Республикасонть истя жо ютавтови «Ялганза» од ломанень форумось, конань лувсо ветяви Росмолодежинь грантонь пелькстамось. Артём Здунов кармавтсь: келейгавтомс регионтнэнь ютксо вейсэнь тевдееманть ды федеральной пелькстамотнес регионтнэнь марто вейсэнь яволявтоматнень каямонть – тень удало вандынь чись.
Республикасонть ламолгадыть од ломанень куншкакуротне: витневи Саранскойсэ Республикань Од ломанень кудось, мейле – Рузаевкань енкссо. Арсеви теемс истят муниципальной куншкакурот Дубенкань ды Чаунзань енкстнэсэ. Республикань руководителесь тешкстызе: муниципальной весе районтнэнь прявттнэнень эряви виевгавтомс важодеманть грантонь лезксэнть лангс яволявтоматнень анокстамонть коряс. Те тевсэнть лездыцякс карми Од ломантнень тевест коряс Госкомитетэсь. Теде башка, покш мель эряви явомс Россиянь велень од ломантнень вейсэндявксонть марто вейсэнь тевдеемантень – те енкссонть уш улить важодевкст. Истя жо эряви витемс кевкстнеманть Гражданской ды патриотической воспитаниянь республикань куншкакуронть туртов зданиянть коряс, педе-пев витнемс сонзэ федеральной программанть лувсо.
Прявт тевтнень ютксо вейкесь, конатнень путынзе Артём Здунов, – весемеендо важодемс сеть од ломантнень марто, конат апак совавто республикань общественной тевтнес: «Те минек сехте прявт тевесь – совавтомс неть эйкакштнень созидательной тевтнес, тонавтомс. Сынст а мереви нолдамс ванновт алдо! Сынь аштить сулей ало, минь сынст а нейтяно. Мезе сынь теить? Кить сынст наставникест? Вана неть тевтнень эряви путомс ды тень коряс сермадомс грантт. А эряви пелемс стака кевкстематнеде! Течи од ломантне малав весе кулятнень саить Интернетстэ. Те максы ламо возможность, истя жо тосо улить тандавкст».
Мелят республикасонть теезь Важодиця од ломанень советэсь. Тень кувалма Мордовиянь Прявтось кармавтсь седе ламо важодемс тень коряс – те эряви весереспубликань кадрань повестканть туртов. Сон истя жо пшкадсь МР-нь Прявтонь ды МР-нь Правительствань Администрациянь руководителентень Булат Хайрутдиновнень – тедеде эряви одс нолдамс «Моя Мордовия» кадрань пелькстамонть.
«Минек од ломантнень изнявксост – те минек туртов виень юр! Кеман, вейсэ минь топавтано седеяк покш цетавкст!» – мерсь Артём Здунов.
Коллегиянть лувсо истя жо казевсть ютазь иенть коряс од ломанень политикань топавтомань енкссо муниципальной районтнэнь пелькстамонь изницятне ды призертнэ. Гран-принть саизе Мордовиянь Рузаевкань енксось.
Мордовия Республикань Прявтонь пресс-службась