Мордовиянь руководителесь Артём Здунов ацамковонь 2-це чистэ якась Н.П. Огарев лемсэ МГУ-нь Медицинань институтонть юрсо важодиця региононь аккредитациянь-симуляциянь куншкакуронтень. Неень шкань тонавтнемань куншкакуросонть специальной тренажертнэсэ студенттнэ-медиктне, ординатортнэ кастыть маштомачист хирургиянть, педиатриянть, неонатологиянть ды акушерстванть-гинекологиянть коряс. 2022 иестэ те куншкакуросонть аккредитация ютасть Россиянь медицинань институттнэнь 700 ламо прядыцятне. Теде башка, куншкакуросонть одс анокстамо ютыть важодиця врачтне.
Артём Здунов макссь покш питне занятиятненень, конат те шкастонть ютавтовсть омбо масторонь студенттнэнь туртов аккредитациянь куншкакуросонть. Од ломантне тешкстызь, содамочитне, конатне тесэ максовить, ладить раськеютконь стандарттнэнень. Индиясто студенттнэнь туртов тонавтнемась ветяви англань кельсэ.
«Саранскоесь – сэтьмечинь ды ялгаксчинь ош. Аволь стяко те лемесь максозель Весероссиянь форумонтень, конась ютавтовсь Мордовиянь госуниверситетсэнть аволь умок. Тесэ тонавтнить студентт масторонь весе регионтнэстэ ды 56 мастортнэстэ», – мерсь Мордовиянь Прявтось.
Республикасонть теезь весе условиятне тонавтнеманть ды эрямонть туртов – ули спортонь вадря инфраструктура, пек паро театрат. Аволь умок университетэнтень максозь «Саранск Арена» Универсальной Залось – покшолмазо 55 тежат кавонзазь метрат, 8 тежат таркат эрьва кодат мероприятиятнень туртов, истя жо раськеютконь уровнянь. Ковдо икеле Мордовияв сакшность Индиясто студенттнэнь тетяст-аваст. «Сынь састь, варштызь, кода эйкакштне эрить, кода тонавтнить, кодамо мель тесэ тенст явови. Маласо шкастонть минек университетс ютыть тонавтнеме эште малав кавто сядот студентт. Аволь стяко – минек тесэ сэтьме ды вадря. Минь кенярдтано весенень!» – тешкстызе Артём Здунов.
Сы иесь Мордовиясо юты раськетнень вейсэндявомань тешксэнть ало. Республикань Прявтось тешкстызе, анокстави покш мероприятиятнень ютавтомань аравтлувось. Истя жо ютавтови «Мы вместе!» раськень культуратнень весероссиянь од ломанень форумось. Мордовиянь университетэнь студенттнэ, конат састь тонавтнеме лия мастортнэстэ, невтсызь тосо эсь раськень культураст.
Мордовия Республикань Прявтонь пресс-службась