Декабрянь 2-це чистэ Мордовиясо важодемань содавтомань шкасто Россиянь Здравоохранениянь министрась Вероника Скворцова ванкшнынзе медицинань зярыя прявт учреждениятнень - Региононь сосудистой центранть, республикань клинической больницянть, Перинатальной центранть, эйкакшонь 3№ поликлиниканть. Республикань клинической больницясонть Министрась максь покш питне лецямонь-диагностикань корпусонь справочной отделениянть парсте теемантень. Истя жо ванкшнынзе кардиохирургиянь, нейрохирургиянь, травмотологиянь операциянь блоктнэнь, анестезиологиянь ды рентгенологиянь отделениятнень, максь покш питне тесэ явовиця медицинань услугатненень, конат ладить неень шкань весе вешематненень. Вероника Скворцова примась участия телемедицинань сеанссонть - Республикань клинической больницянь специалистэ максть консультация Торбеевань межрайононь больницянь лецицятненень. Министрась кевкстнесь, кода сседьстэ максовить онлайн-консультациятне райононь медиктненень ды ёвтызе арсеманзо, телемедицинань сеанстнэнь эряви ютавтомс планонь коряс. Тешкстызе, Мордовиясо теезь вадря условият лезэнь кандыця те направлениянть виевгавтомга.
Седе тов Россиянь Здравоохранениянь министрась ванкшнызе Саранскоень эйкакшонь 3№ поликлиниканть, конась панжозь 2014 иестэнть ды течи тов кандовить ошонь Пролетарской енксонь 18 тёжат эйкакштне. Медицинань лезксэсь тесэ максови 26 ёнксстнэнь коряс.
Вероника Скворцова кевстнесь, кода ладязь важодемась поликлиникань регистратурасонть, кода моли врачтнэнень сёрмадстомась инфоматнэнь ды интернетэнть вельде. Министрась ванкшнызе куроксто лезксэнь явомань нупаленть, гидромассажонь ваннанть, бассейнанть. Инжетне истя жо ванкшнызь шумбрачинь кемекстамонь отделениянть, тесэ ютыть реабилитация Мордовиянь весе районтнэнь эйкакштне, конатнень улить хронической ормаст, сынст ютксо ДЦП-сь ды якамонь коламось. 2016 иень 9 ковтнень перть тесэ лецявсть 6336 эйкакшт, сынст ютксо 120 эйкакшт-инвалидт.
Участковой врачось-педиатрась Ирина Проскурина невтизе, кода ветявить электронной амбулаторной картатнэ. Весемезэ поликлиникасонть педиатрань 2 отделеният, ков совить 22 участкат.
Мордовия Республикань клинической перинатальной центрасонть ютавтовсь медиктнень марто вастовомась. Мордовиянь Прявтось ёвтнесь, кода тееви республикасонть здравоохранениянь колмо уровнянь системась. Тешкстызе, васенце звенань медицинской специалисттнэнь вадрясто тевест топавтомась лезды витемс ламо стакачить, конат уш а лисить лия этаптнэсэ. "Минь покш мель явтано межрайононь медицинань центратнень важодемантень, чинь стационартнэс эрицятнень пачтямга рамазь вадря микроавтобуст. Высшей уровнянь медицинась истя жо одкстомтови, ламо изнязь, ансяке тень лангс минь а лоткатано, те ёнкссо важодемась ули поладозь ды сы шкастонть отраслянть виневгавтомань прявт тевекс ашти здравоохранениянь важодицятненень лездамось, те участковой врачтнэнень - педиатратненень, терапевтнэнень, общей практикань врачтнэнень ды лия специалисттнэнень "подъемнойтнэнь" пандомась. Теде башка, Мордовиянь медиктне сеедьстэ ютыть стажировка Россиянь ды омбо масторонь неень шкань центратнесэ.
Минь а карматано жалямо ярмакт сень туртов, штобу Мордовиясо улевельть пек превей врачт, - башка тешкстызе Владимир Волков. - Минек прявт тевемек теемс весементь, республикань медицинань центратне кармась регионъютконь".
Вероника Скворцова эсь кортамосонзо ёвтнинзе республикадонть мелензэ-арсеманзо, те сонзэ Мордовияв васенце самозо. Министрась тешкстызе, важодемань те содавтомась пек сюпаволь ды сон несь виев эскелькстнэнь, конатнень теинзе здравоохранениясь ды республикась целанек меельце иетнестэ. РФ-нь Минздравонь прявтось максь покш питне "Биохимик" ПАО-нть юрсо фармакологиянь од производстванть теемантень. Сонзэ валонзо коряс, региононь прявт вузонть марто вейсэ лия енов а молиця Научно-производственной фармацевтической теемась лезды вельмевтемс советской шкань маштомачитнень Мордовиясо антибиотиктнень нолдамост коряс.
"Минь ваннынек региононь сосудистой центрань важодеманть, сосудистой первичной отделениятнень марто ладязь важодеманть. Те вейкине сеть, тосо чинь-вень перть ветявить консультацият, весе пек вадрясто теезь. Ды уш улить редявикс результатт - нурька шкань перть Мордовиянтень удалась саемс пек вадря невтевкст аволь ансяк Россиясо, весе мирэнть келес седеень-санонь орматнеде куломатнень киртямост коряс. Нама, покш тарка неть изнявкстнэсэ саить покш технологиянь медицинань методтнэнь тевс ноддамось", - тешкстызе Вероника Скворцова.
Россиянь Здравоохранениянь министрась ёвтась сюкпрянь валт Мордовиянь медиктненень вадря важодеманть кисэ ды евтась поздоровт саезь изнявкстнэнь кисэ.
"Сюкпрянь башка валт Владимир Дмитриевич Волковнень. Республикань Прявтось прими участия здравоохранениянь эрьва мероприятиясонть, яви мель эрьва проектэнтень. Сон пек вадрясто чарькоди неень шкань технологиятнесэ, процессэнь информатизациясонть, медицинань покш комплекстнэнь стявтомань башка ёнкстнэсэ. Региононь прявтонть, сонзэ важодицятнень мелень те явомась - Мордовиясо здравоохранениянь сферанть виевгавтомань прявт лув", - тешкстызе Вероника Скворцова.
Вастовоманть прядовомга РФ-нь Здравоохранениянь министрась ды Мордовиянь Прявтось явшесть казнеть сехте вадря терапевтнэнень, конат совасть васенце "Россиянь терапевтэнь рейтингентень". Медиктненень ёвтазь Мордовия Республикань Прявтонть Благодарность ды максозь "Лучший терапевт ТОП 500" Почетонь дипломт.
Журналистнэнь кевкстемаст лангс каршо валонь максомсто, Вероника Скворцова тешкстызе:
"Васняяк, Мордовиясо прядовома лангсо здравоохранениянь колмо уровнянь системанть теемась. Васенце звенась кемекстазь, апак киртя вейкеяк ФАП, теде башка - стявтозь 43 одт, конатнесэ ули эрявикс оборудования. Неень шкане республикань эрицятненень, сынст ютксо райононь ды велень ломантнененьгак, ули возможностест получамс медицинань эрявикс лезкс. Максозь медицинань куроктсо лезксэнь явомань од автомобильть. Те теезь кода федеральной, истя жо региононь бюджетнэнь вельде. Те лезды видестэ ды куроксто пачтямс сэредицянть медицинской учрежденияс. Пек вадрясто теезь медицинань организациятнень сетесь, конат явить лезкс экстренной тевтнестэ.
Виевгавтови информатизациясь, поладови медицинас цифровой технолгиятнень совавтомась. Эряви тешкстамс, Мордовиясо уш ней медицинань весе организациятнесэ ули покш скоростень интернет, тевс нолдави электронной документооборотось, врачтнэнень электронной сёрмадстомась. Неть изнявкстнэ редявить демографиясояк: республикасонть чачтыцятнень куломась - 0, ансяк чачозетнень куломась - 4,8 (тёжас живстэ чачозетнень коряс), киртяви покш ломантнень куломась".
Мордовия Республикань Прявтось Владимир Волков:
"Течи улить весе условиятне сень туртов, Мордовиянь медицинань центратнесэ покш технологиянь лезксэнть получавольть аволь ансяк эсенек республикань эрицятне, истя жо лия региононсетнеяк. Истямо тев путыть икеленк Россиянь Президентэсь ды здравоохранениянь министерствась.
Ули мелем ёвтамс покш сюкпря Вероника Игоревнанень ды весенень, кить састь Мордовияв, се мелень явоманть кисэ, минек кевкстематнень ды стакачитнень видестэ чарькодеманть кисэ. Минь ванкшнынек малав весе кевкстематнень, конатнень эряви теемс Мордовиясо медицинской обсуживаниянть вадрялгавтомга, миненек ули мезе лангсо вейсэ важодемс ды кемтяно Россиянь Минздравонть лезксэнть лангс минек проектнэнь топавтомсто.